سەناتور اندرەي لۋكين «نۇرلى جەر» قولجەتىمدى تۇرعىن ءۇي سالۋ مەملەكەتتىك باعدارلاماسىن ىسكە اسىرۋ كورسەتكىشتەرىنە قاتىستى ۇكىمەت باسشىسى اسقار ءماميننىڭ اتىنا دەپۋتاتتىق ساۋال جولدادى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
دەپۋتات «نۇرلى جەرگە» بولىنگەن قاراجاتتىڭ 50%-دان استامى يگەرىلمەگەنىنە نازار اۋدارۋىن سۇراپ، مينيسترلەر كابينەتىنىڭ باسشىسىنا ساۋال جولدادى.
ا. لۋكيننىڭ ايتۋىنشا، باعدارلاماعا 873,8 ملرد تەڭگە بولىنسە، ونىڭ تەك 476,8 ملرد تەڭگەسى عانا جۇمسالعان. ال تۇرعىن ءۇي العىسى كەلەتىندەردىڭ سانى كۇن ساناپ وسە بەرەدى.
«كەزەكتە تۇرعانداردىڭ ەڭ كوبى نۇر-سۇلتان قالاسىندا تىركەلگەن، وندا 45,2 مىڭ ادام، ال الماتى وبلىسىندا 43,3 مىڭ ادام كەزەكتە تۇر»، - دەدى اندرەي لۋكين سەناتتىڭ جالپى وتىرىسىندا.
سونىمەن بىرگە، يندۋستريا جانە ينفراقۇرىلىمدى دامىتۋ مينيسترلىگىنىڭ مالىمەتى بويىنشا 2017-2019 جىلدار ارالىعىندا ەلىمىزدە «نۇرلى جەر» باعدارلاماسىمەن 32,5 ملن شارشى مەتر تۇرعىن ءۇي سالىندى.
ونىڭ پايىمىنشا، بۇل مولشەر جەتكىلىكسىز، ويتكەنى كەزەكتە تۇرعانداردىڭ سانى ءالى دە كوپ. تىزىمدە نەگىزىنەن الەۋمەتتىك وسال توپ ازاماتتارى، مەملەكەتتىك قىزمەتكەرلەر، بيۋدجەت ۇيىمدارىنىڭ قىزمەتكەرلەرى جانە اسكەريلەر بار.
«مەملەكەتتىك باعدارلامانى ىسكە اسىرۋعا بولىنگەن بيۋدجەت قارجىسىن يگەرۋ دەڭگەيىنىڭ تومەندىگىن، سونداي-اق ازاماتتاردى تۇرعىن ۇيمەن قامتاماسىز ەتۋدىڭ اسىرا باعالانعان كورسەتكىشىن ەسكەرە وتىرىپ، بولىنگەن قارجىنىڭ پايدالانىلۋى، تاپسىرىلعان تۇرعىن ءۇيدىڭ ءبولىنۋى مەن مەملەكەتتىك باعدارلامانى ىسكە اسىرۋدىڭ تۇرعىن ۇيگە مۇقتاج ازاماتتاردىڭ سانىن ازايتۋعا ناقتى اسەرى تۋرالى اقپارات بەرۋىڭىزدى سۇرايمىن»، - دەدى اندرەي لۋكين.
بۇگىنگى كۇنى قازاقستاننىڭ تۇرعىن ءۇي قورىنىڭ اۋدانى 347,4 ملن شارشى مەترگە، كوپ پاتەرلى تۇرعىن ۇيلەردىڭ سانى 78 402-گە جەتتى.
فوتو اشىق دەرەككوزدەن الىندى
