«Nurly jer» baǵdarlamasynyń 50 %-y ıgerilmegen

1241

Senator Andreı Lýkın «Nurly jer» qoljetimdi turǵyn úı salý memlekettik baǵdarlamasyn iske asyrý kórsetkishterine qatysty Úkimet basshysy Asqar Mamınniń atyna depýtattyq saýal joldady, dep habarlaıdy «Adyrna» ulttyq portaly QazAqparatqa silteme jasap.

Depýtat «Nurly jerge» bólingen qarajattyń 50%-dan astamy ıgerilmegenine nazar aýdarýyn surap, Mınıstrler kabınetiniń basshysyna saýal joldady.

A. Lýkınniń aıtýynsha, baǵdarlamaǵa 873,8 mlrd teńge bólinse, onyń tek 476,8 mlrd teńgesi ǵana jumsalǵan. Al turǵyn úı alǵysy keletinderdiń sany kún sanap óse beredi.

«Kezekte turǵandardyń eń kóbi Nur-Sultan qalasynda tirkelgen, onda 45,2 myń adam, al Almaty oblysynda 43,3 myń adam kezekte tur», - dedi Andreı Lýkın Senattyń jalpy otyrysynda.

Sonymen birge, Indýstrııa jáne ınfraqurylymdy damytý mınıstrliginiń málimeti boıynsha 2017-2019 jyldar aralyǵynda elimizde «Nurly jer» baǵdarlamasymen 32,5 mln sharshy metr turǵyn úı salyndy.

Onyń paıymynsha, bul mólsher jetkiliksiz, óıtkeni kezekte turǵandardyń sany áli de kóp. Tizimde negizinen áleýmettik osal top azamattary, memlekettik qyzmetkerler, bıýdjet uıymdarynyń qyzmetkerleri jáne áskerıler bar.

«Memlekettik baǵdarlamany iske asyrýǵa bólingen bıýdjet qarjysyn ıgerý deńgeıiniń tómendigin, sondaı-aq azamattardy turǵyn úımen qamtamasyz etýdiń asyra baǵalanǵan kórsetkishin eskere otyryp, bólingen qarjynyń paıdalanylýy, tapsyrylǵan turǵyn úıdiń bólinýi men memlekettik baǵdarlamany iske asyrýdyń turǵyn úıge muqtaj azamattardyń sanyn azaıtýǵa naqty áseri týraly aqparat berýińizdi suraımyn», - dedi Andreı Lýkın.

Búgingi kúni Qazaqstannyń turǵyn úı qorynyń aýdany 347,4 mln sharshy metrge, kóp páterli turǵyn úılerdiń sany 78 402-ge jetti.

Foto ashyq derekkózden alyndy

Pikirler
Redakııa tańdaýy