قازاقستان قازىرگى احۋالعا قاراماستان ستراتەگيالىق دامۋ ماقساتتارىن دايەكتى تۇردە ىسكە اسىرادى. بۇل تۋرالى «Nur Otan» پارتياسىنىڭ كەزەكتەن تىس XX سەزىندە قر پرەزيدەنتى قاسىم-جومارت توقاەۆ ايتتى، دەپ حابارلايدى قازاقپارات ءتىلشىسى.
«پارتيامىزدىڭ كەزەكتەن تىس XX سەزى كۇردەلى ءارى ماڭىزدى كەزەڭدە وتكىزىلىپ وتىر. بۇل مەملەكەتىمىزدىڭ قوعامدىق-ساياسي ومىرىندەگى ايتۋلى وقيعا. بۇگىندە «Nur Otan» پارتياسى ەل تاعدىرىنا جاۋاپتى ەڭ باستى ساياسي كۇشكە اينالدى. حالقىمىز بىزگە قاشاندا زور سەنىم ارتادى. اسىرەسە جاھاندىق داعدارىس كەزىندە ەل اماناتىنا ەرەكشە كوڭىل ءبولۋىمىز كەرەك. بۇكىل الەمگە تاراعان پاندەميا قازاقستانعا دا وڭاي تيگەن جوق.
مەملەكەت ازاماتتارىمىزدىڭ دەنساۋلىعىن قورعاۋ ءۇشىن بارلىق قاجەتتى شارالاردى قابىلداپ جاتىر»،- دەدى قازاقستان پرەزيدەنتى. مەملەكەت باسشىسى پارتيا تاراپىنان حالىققا ۇدايى قولداۋ كورسەتىلىپ كەلە جاتقانىن ايتتى. پارتيا بەلسەندىلەرى جانە ەرىكتىلەرى مۇقتاج جانداردان كومەگىن اياماعانىن اتاپ ءوتتى. «وسىنداي ناقتى جۇمىس پەن جاناشىرلىق بەرەكە-بىرلىگىمىزدى ارتتىرا تۇسەدى. قازاقستان قازىرگى احۋالعا قاراماستان ستراتەگيالىق دامۋ ماقساتتارىن دايەكتى تۇردە ىسكە اسىرادى. بۇل رەتتە ەلباسى ساياساتىنىڭ ساباقتاستىعىن قامتاماسىز ەتۋ نەگىزگى مىندەتتىڭ ءبىرى. مەن بيىلعى جولداۋىمدا پارتيانىڭ قوعامداعى جەتەكشى ءرولى تۋرالى ايتتىم. ءبىز رەفورمالاردى جۇزەگە اسىرۋ بارىسىندا «Nur Otan» پارتياسىنىڭ زور الەۋەتىنە سۇيەنەمىز»،- دەدى قاسىم-جومارت توقاەۆ.
