20 قاراشا كۇنى «ADAL BILIM» الاڭىندا «ۋنيۆەرسيتەتتەردەگى تسيفروۆيزاتسيا» تاقىرىبى بويىنشا تىكەلەي ەفير ءوتتى. قر بعم قاراستى «ADAL BILIM» جوبالىق كەڭسەسىنىڭ ۇيىمداستىرۋىمەن وتكەن شاراعا قازاقستاندىق جوعارى وقۋ ورىندارىنىڭ رەكتورلارى مەن پرورەكتورلارى، ءبىلىم سالاسى بوينىشا ساراپشىلار قاتىسىپ، جوعارى ءبىلىم سالاسىنداعى تسيفرلاندىرۋ ماسەلەسىن تالقىلادى.
كازگيۋ ۋنيۆەرسيتەتى باسقارما توراعاسىنىڭ ءبىرىنشى ورىنباسارى عالىمجان قۇدايبەرگەنوۆ پاندەمياعا جوعارى وقۋ ورىندارى ءار ءتۇرلى دەڭگەيدە دايىن بولعانىن ايتادى. دەگەنمەن ۋنيۆەرسيتەتتەر سونىڭ ارقاسىندا دامۋدىڭ ءداستۇرلى تاسىلدەرىن قايتا قاراستىرىپ، زاماناۋي بىلىمگە ءبىر تابان جاقىنداي تۇسكەنىن دە اتاپ ءوتتى. سونداي-اق عالىمجان بايانقۇلۇلى قاتىسۋشىلارعا ستۋدەنتتەر مەن اتا-انالار ءۇشىن ىسكە قوسىلعان Smart KAZGUU ءموبيلدى قوسىمشاسىن تانىستىردى.
«بۇگىندە ستۋدەنتتەر ۇيدەن شىقپاي-اق شوتىنداعى بالانسىن ءوزى باسقارا الادى. سونداي-اق ساباق كەستەسىن ءوزى قۇرىپ، ءوتىنىشتى ەلەكتروندى تۇردە جازادى، انىقتامالار مەن قۇجاتتاردى دا قولما-قول الۋعا مۇمكىندىگى بار. مۇنداي قىزمەتتەردىڭ بارلىعى ولارعا ءموبيلدى قوسىمشانىڭ كومەگىمەن كورسەتىلەدى. "قارجى" ءبولىمى ارقىلى ستۋدەنت ءوزىنىڭ بالانسىن باسقارادى. ستۋدەنت نەمەسە اتا-اناسى بالانستى تولىقتىرا الادى جانە شوتتا قانشا قالعانىن تەكسەرە الادى. سونداي-اق ستۋدەنتتەرگە ءبىر سەمەستر نەمەسە بەلگىلى ءبىر كەزەڭ بويىنشا كوشىرىمىن الۋعا مۇمكىندىك قاراستىرىلعان», - دەدى عالىمجان قۇدايبەرگەنوۆ.
ءموبيلدى قوسىمشانىڭ تاعى ءبىر ارتىقشىلىعى، ستۋدەنت كرەديتتىك وقىتۋ جۇيەسى بويىنشا ءوزىنىڭ ساباق كەستەسىن قۇرۋىنا بولادى. وقىتۋشىنى، ساباق ۋاقىتى مەن كۇنىن دە ءوزى تاڭداي الادى.
تىكەلەي ەفيردە وتكەن تالقىلاۋعا قاتىسۋشىلار ءاربىر جوعارى وقۋ ورنى ءبىلىم بەرۋدەگى كلاسسيكالىق تاسىلدەر مەن تسيفرلاندىرۋدى ءساتتى ۇيلەستىرەتىن قاشىقتان وقىتۋدىڭ اۆتورلىق مودەلىن ازىرلەۋ قاجەت دەگەن قورىتىندىعا كەلدى.
“ادىرنا” ۇلتتىق پورتالى
