ماقسات تولىقباي ەفيردەن كەتپەك

3397
Adyrna.kz Telegram

بەلگىلى جۋرناليست، «QAZAQSTAN» ۇلتتىق ارناسىنىڭ باس پروديۋسەرى ماقسات تولىقباي ءبىرىنشى جەلتوقساننان باستاپ ەفيردەن كەتەدى، دەپ حابارلايدى «ادىرنا» ۇلتتىق پورتالى. ول بۇل تۋرالى Facebook جەلىسىندەگى رەسمي پاراقشاسىندا جازدى.

«ارىپتەسىم، جۋرناليست دينا ەلگەزەك «ماقسات تولىقبايدىڭ ساياسي ناۋقاننىڭ الدىندا نەگە ساياسي بەلسەندىلىگى ارتا تۇسەدى؟» دەپ جازىپتى. بىلتىرعى سايلاۋدى مەڭزەگەن بولار. رينات زايتوۆتى بوساتۋىن تالاپ ەتىپ، ەكى ساعاتتا ءۇش مىڭ ادام جينالعان ەدىك. وسى جولى جارق ەتىپ بىرەۋ شىقسا قولداۋعا دايىن ەدىم. كۇتتىم...

اشىعىن ايتايىق، جاڭا پارتيا تىركەتۋگە مۇمكىندىك جوق. ماجوريتارلى ەمەس، پروپورتسيونالدى جۇيە بولعاندىقتان، جەكە وكرۋگتەن دە تۇسە المايسىڭ. قازىرگى جۇيەدە بايكوت جاريالاۋ دا ىسكە اسپايدى.

بىرنەشە پارتيادان ۇسىنىس ءتۇستى. ۇزاق ويلاندىم.  قىسقاسى، الداعى سايلاۋدا «ادال» پارتياسىنىڭ اتىنان كانديدات رەتىندە قاتىسپاقپىن. نەگە؟ ويتكەنى "ادالداعى" جاستاردىڭ ۇلەسى 60 پايىز بولعان سوڭ. قازىر قوعام ناقتى قادامدار كۇتەدى. پارلامەنت زاڭ شىعارۋشى ورگان عانا ەمەس، وندا قوعامنىڭ ەڭ وزەكتى ماسەلەلەرى تۇگەل ايتىلۋى كەرەك. باعىمدى سىناپ كورەيىن. ەشتەڭە ىستەمەگەن ادام عانا قاتەلەسپەيدى. نار تاۋەكەل! ازاماتتىق قوعامنىڭ دامۋىنا تيتتەي دە بولسا ۇلەس قوسسام دەيمىن»،-دەدى جۋرناليست.

سونداي-اق، ماقسات تولىقباي  «باس  پروديۋسەر» قىزمەتىن سەنىپ تاپسىرعان «QAZAQSTAN» ۇلتتىق ارناسىنىڭ باسشىلىعىنا راقمەتىن ايتتى.

«وتكەندە ەستەرىڭىزدە بولسا «جۋرناليست ساياسي پارتيادا بولماۋى ءتيىس»، - دەگەن ەدىم. قىسقاسى، ءبىرىنشى جەلتوقساننان باستاپ  ەفيردەن كەتەمىن»,-دەپ ءسوزىن قورىتىندىلادى ول.

«ادىرنا» ۇلتتىق پورتالى

پىكىرلەر