«قازاقتىڭ ءتىلى باي، سوزدىك قورى مول» دەپ جاتامىز. ءيا، بۇل راس.
احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى، پروفەسسور نۇرگەلدى ءۋاليۇلى «حV-ءحVىى ع.ع. قازاق مەملەكەتتىگىمەن بايلانىستى قازاق تىلىندە جازىلعان ءارتۇرلى جازبا ءماتىن، قۇجات نۇسقالار بولدى. دەمەك جازبا ءتىل بولعانى حاق. قازاق حان-سۇلتاندارىنىڭ بۇيرىق-جارلىقتارى، كورشى ەلدەرمەن جازىسقان ديپلوماتيالىق قاتىناس قاعازدارى، ءوزارا جازىسقان حاتتارى ت.ب. ەسكى قازاق جازبا ءتىلىنىڭ ۇلگى-نۇسقالارى بولىپ سانالادى. اكادەميكتەر ءا.مارعۇلان، ر.سىزدىق ت.ب. عالىمدار قادىرعالي بي جالايىريدىڭ، ابىلعازى ءباھادۇردىڭ «تۇرىك شەجىرەسىن» ەسكى باستاۋ كوزدەرىنە جاتقىزادى. پروف. باباش ابىلقاسىموۆ قازاق جازبا ءتىلىنىڭ «تۇركىستان ءۋالاياتى» (1870-1882), «دالا ءۋالاياتى» گازەتتەرىن قازاق جازبا ءتىلىنىڭ ەسكى ۇلگىلەرى دەپ تانيدى، قازىرگى جاريالانىپ جاتقان ءماشھۇر ءجۇسىپ مۇرالارىندا ەسكى قازاق جازبا ءتىلىنىڭ ۇلگىلەرى مولىنان كەزدەسەدى»، — دەگەن بولاتىن
ۇلت جاناشىرى احمەت بايتۇرسىنۇلىنىڭ تەرمين جاساۋ بارىسىنداعى ۇستانعان باستى قاعيداتى قازاق ءتىلىنىڭ ىشكى رەسۋرستارىن، لەكسيكالىق بايلىعىن، ءسوزجاسام تəسىلدەرىن مۇمكىندىگىنشە پايدالانۋ بولعانىن بىلەمىز. سوزدىك قورىمىزدى ۇلتتىق نەگىزدە دامىتۋ جولىندا ەسكى قازاق جازبا تىلىندەگى ەل-جۇرت، جەر-سۋ اتاۋلارى، استرونوميالىق، اسكەري-əكىمشىلىك تەرميندەر جانە ت.ب. ءوز سەپتىگىن تيگىزەرى ءسوزسىز. الايدا ەسكى قازاق جازبا ءتىلى ءالى دە تولىق زەرتتەۋدى قاجەت ەتىپ وتىر.
قۋانىش جۇمابەكۇلى
PhD دوكتورى، احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ عىلىمي قىزمەتكەرى
فەيسبۋك پاراقشاسىنان
