پرەزيدەنت قاسىم-جومارت توقاەۆ قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعانۇلىن قابىلدادى دەپ حابارلايدى «ادىرنا» ۇلتتىق پورتالى Akorda.kz سايتىنا سىلتەمە جاساپ.
مەملەكەت باسشىسىنا قازاقستان مۇسىلماندارى ءدىني باسقارماسىنىڭ پاندەميا كەزىندە جاساعان قايىرىمدىلىق شارالارى جايىندا مالىمەت بەرىلدى. ناۋرىزباي قاجى تاعانۇلى ىندەت كەزىندە ءمۇفتيات تاراپىنان اۋرۋحانالارعا جاساندى تىنىس الۋ، وتتەگى اپپاراتتارى مەن مەديتسينالىق قۇرال-جابدىقتار، مۇقتاج جاندارعا ءدارى-دارمەكتەر، مەشىتتەردىڭ جانىنداعى تىگىن تسەحتارىندا تىگىلگەن بەتپەردەلەر مەن قورعانىس كيىمدەرىنىڭ تەگىن تاراتىلعانىن اتاپ ءوتتى. سونىمەن قاتار «ەل ۇلەسى – پاتەردە» اكتسياسى اياسىندا 314 باسپانا بەرىلگەنىن ايتتى. بۇدان بولەك يمامداردىڭ ءبىلىمىن كوتەرۋ، كادر دايارلاۋ ماسەلەلەرى جايىندا باياندادى.
ناۋرىزباي قاجى تاعانۇلى قاسىم-جومارت توقاەۆقا ءمۇفتيات الداعى ۋاقىتتا «يحسان» ءىلىمىن، ابايدىڭ كەمەل ادام كونتسەپتسياسىن كەڭىنەن دارىپتەپ، ناسيحاتتاۋ جۇمىستارىمەن اينالىساتىنىن جەتكىزدى.
كەزدەسۋ بارىسىندا قازاقستان مۇسىلماندارى ءدىني باسقارماسىنىڭ الداعى جوسپارلارى تۋرالى دا ءسوز بولدى. اتاپ ايتقاندا، يسلام اكادەمياسىن قۇرۋ، يسلام جانە تەولوگيا كىتاپحاناسىن سالۋ، ەلىمىزدەگى مەشىتتەردىڭ ارحيتەكتۋراسىن قازاقى سالت-ساناعا ساي قالىپتاستىرۋ ماسەلەلەرى ايتىلدى.
كەزدەسۋ سوڭىندا پرەزيدەنت قاسىم-جومارت توقاەۆ قازاقستان مۇسىلماندارى ءدىني باسقارماسىنىڭ جۇمىسىن جوعارى باعالاپ، الداعى باستامالارىنا ساتتىلىك تىلەدى.
