ءباا الكوگولگە، سۋيتسيدكە، ازاماتتىق نەكەگە تىيىم سالمايدى

2704
Adyrna.kz Telegram

ءباا بيلىگى الكوگول ىشكەندەرگە، وزىنە قول جۇمساعىسى كەلگەندەرگە قاتىستى جازانى الىپ تاستادى جانە نەكە قيىلماعان جۇپتارعا بىرگە تۇرۋعا رۇقسات ەتتى، - دەپ حابارلايدى «ادىرنا» ۇلتتىق پورتالى  Tengrinews.kz تىلشىسىنە سىلتەمە جاساپ.

سەنبىدە ءباا پرەزيدەنتى حاليفا بەن زەيد ءال ناحايان جەكە ستاتۋس جانە ازاماتتىق قاتىناستارعا قاتىستى  قىلمىستىق جانە قىلمىستىق-پروتسەسسۋالدىق كودەكستەرگە وزگەرىستەر ەنگىزۋدى بەكىتتى. اتاپ ايتقاندا، "ار-نامىسىن قورعاۋ ءۇشىن جاسالعان قىلمىستى" جەڭىلدەتۋدى قاراستىراتىن باپ الىپ تاستالدى.

وزگەرتۋلەر ەنگىزىلگەننەن كەيىن ءباا-دە الكوگول ءىشۋ قىلمىس بولىپ ەسەپتەلمەيدى. ەندى 21 جاستان اسقان ازاماتتارعا جەكە نەمەسە بەلگىلى ءبىر قوعامدىق ورىنداردا الكوگول ىشۋگە بولادى. بۇعان دەيىن ءباا-دە مۇسىلمان ەمەس، جاسى 21-دەن اسقان تۋريستەر مەن شەتەل ازاماتتارىنا عانا الكوگول ىشۋگە جانە ساتىپ الۋعا رۇقسات ەدى.

بۇدان باسقا، باسىلىم مالىمەتىنشە، ەندى وزىنە قول جۇمساۋعا تىرىسقاندار قىلمىستىق جاۋاپقا تارتىلمايدى جانە نەكەسى قيىلماعان جۇپتارعا بىرگە تۇرۋعا رۇقسات ەتىلدى.

سونداي-اق، ءباا-دە ايەلدەرگە قاتىستى زورلىق-زومبىلىق جاساعاندار ءۇشىن جازا قاتاڭداتىلعان.

پىكىرلەر