ازەربايجان پرەزيدەنتى يلحام اليەۆ جەكسەنبىدە ەل اسكەرىنىڭ تاۋلى قاراباقتاعى ەكىنشى ۇلكەن قالا – شۋشانى باقىلاۋعا العانىن ايتتى. بۇل حاباردى Reuters اگەنتتىگى تاراتتى دەپ جازادى ازاتتىق راديوسى.
"[بۇگىنگى كۇن] ازەربايجان تاريحىنداعى ەرەكشە كۇن بولادى" دەگەن اليەۆ قارۋلى كۇشتەردىڭ شۋشانى باقىلاۋعا العانىن حابارلادى.
باكۋدە حالىق جينالىپ، وقيعانى تويلاپ جاتىر. كوشەدە ۇلتتىق جالاۋدى جەلبىرەتىپ، ۇرانداتىپ جۇرگەندەر، كولىكتەرىنىڭ سيگنالىن باسىپ جاتقاندار كوپ.
مويىندالماعان تاۋلى قاراباق ايماعىنىڭ باسشىلىعى جانە ارمەنيانىڭ قورعانىس مينيسترلىگى اليەۆتىڭ اقپاراتىن جوققا شىعاردى.
ارمەنيا قورعانىس مينيسترلىگى ستراتەگيالىق نىسان ءۇشىن كەسكىلەسكەن ۇرىس ءجۇرىپ جاتىر دەپ مالىمدەسە، مويىندالماعان تاۋلى قاراباق رەسپۋبليكاسىنىڭ قورعانىس ارمياسى ازەربايجاننىڭ باسىپ كىرۋ ارەكەتىنە بىرنەشە مارتە توسقاۋىل بەرگەندەرىن ايتتى.
تۇركيا باسشىلىعى ازەربايجاندى وسى وقيعامەن قۇتتىقتادى.
"ازەربايجان باۋىرلارىمدى شۋشاداعى جەڭىسىمەن قۇتتىقتايمىن. بۇل وككۋپاتسيالانعان جەردىڭ قالعان بولىگى دە جۋىق ارادا قايتارىلادى دەگەن ءسوز" دەدى تۇركيا پرەزيدەنتى رەجەپ تايىپ ەردوعان ەلدىڭ سولتۇستىك-باتىسىنداعى كوجاەلي ايماعىندا جينالعان جۇرت الدىندا سويلەگەن سوزىندە.
ازەربايجان وڭتۇستىك كاۆكازداعى 25 جىلداعى ەڭ قاندى سوعىستا ءبىر ايدان استام ۋاقىت ىشىندە تاۋلى قاراباق پەن ونىڭ ماڭايىنداعى جەردىڭ ءبىرازىنا باقىلاۋ ورناتتى. 1990 جىلدارداعى سوعىستا باكۋ بۇل جەردەن ايرىلىپ قالعان ەدى.
ازەربايجاندار "شۋشا", ارمياندار "شۋشي" دەپ اتايتىن بۇل قالا ايماق ورتالىعى ستەپاناكەرتتەن وڭتۇستىككە قاراي 15 كيلومەتر جەردە ورنالاسقان.
شۋشا ەكى حالىق ءۇشىن دە مادەني ءارى ستراتەگيالىق ماڭىزى بار ورتالىق سانالادى. مۇندا ەكى حالىقتىڭ دا تاريحي، ءدىني جادىگەرلەرى ورىن تەپكەن. سوعىسقا دەيىن شۋشا تۇرعىندارىنىڭ كوپشىلىگى ازەربايجان بولعان.
حالىقارالىق دەڭگەيدە ازەربايجاننىڭ جەرى بولىپ سانالاتىن، كوبىنە ارمياندار قونىستانعان تاۋلى قاراباق ايماعىندا ۇرىس قايتا باستالعان التى اپتا ىشىندە 1 مىڭعا جۋىق ادام قازا بولعان.
بۇل قالا ازەربايجان كۇشتەرىنىڭ ايماقتىڭ نەگىزگى قالاسى – ستەپاناكەرتكە شابۋىل جاساۋىنا پلاتسدارم بولۋى مۇمكىن. سوڭعى كۇندەرى ەكى قالا دا قارقىندى اۋە شابۋىلىنا ۇشىراعان. ازەربايجان قورعانىس مينيسترلىگى بەيبىت تۇرعىندار تۇراتىن اۋداندار بومبالاندى دەگەن حاباردى "جالعان اقپارات" دەپ اتادى.
