بۇگىن قالا اكىمى مۇرات ايتەنوۆكە 9 ايدىڭ قورىتىندىسى بويىنشا
ەڭبەكشى اۋدانىنىڭ اكىمى عالىمجان يلياسوۆ ەسەپ بەردى.
ەسەپتى كەزدەسۋگە قالا اكىمىنىڭ ورىنباسارى مەن باسقارما باسشىلارى قاتىستى. اۋدان اكىمى ءوز بايانداماسىندا مەملەكتتىك باعدارلامالاردىڭ ورىندالۋ بارىسى مەن اتقارىلعان جۇمىستارى جونىندە مالىمدەدى.
قالا اكىمى ەڭبەكشى اۋدانىن ارالاۋ بارىسىندا كورگەن كەمشىلىكتەر بويىنشا اۋدان اكىمىنىڭ جۇمىسىن سىنعا الدى. ماسەلەن، وتكەن جىلدىڭ ءتيىستى كەزەڭىمەن سالىستىرعاندا كەيبىر سالادا تومەن كورسەتكىشتەر بار ەكەنى ايتىلدى. اتاپ ايتقاندا، قىسقى جىلىتۋ ماۋسىمىنا دايىندىق ءوز دەڭگەيىندە ەمەس. قاتتى وتىندى پايدالاناتىن 1632 جەكە تۇرعىن ۇيگە 5068 توننا كومىر قاجەتتىلىگى بار. اۋدان اكىمدىگى تاراپىنان تەك 4800 توننا جەتكىزىلگەن.
- تۇرعىندار قالىڭ قار تۇسكەن كەزدە قينالىپ جۇرمەۋى ءۇشىن، بۇگىن دايىندىقتى تولىعىمەن اتقارۋ كەرەك. ءاربىر ۇيگە جىلۋدىڭ قوسىلعانىن جەكە تەكسەرىپ شىعۋ قاجەت. كۇزگى جاۋىن-شاشىنعا يرريگاتسيالىق ارىقتار دا تولىق تازالانباعان. سونىمەن قاتار، مىنا ىندەت بارشانى سانيتارلىق تازالىققا ۇيرەتىپ جاتىر. ال اۋداندى ارالاساڭ تەك ورتالىق جەرلەر عانا تازالانىپ، قالعان شالعاي مەكەندەردە ءار جەردە قوقىس شاشىلىپ جاتقانى كوزگە شالىنادى. كوممۋنالدىق جۇمىستار ناشار دەڭگەيدە جۇرگىزىلىپ جاتىر، -دەدى قالا اكىمى.
كەمشىلىكتەردىڭ مەرزىمىندە ورىندالماعانىن ايتقان مۇرات ايتەنوۆ اۋدان اكىمىنە سوگىس بەرۋ جونىندە شەشىم قابىلدادى.
شىمكەنت قالاسى اكىمىنىڭ ءباسپاسوز قىزمەتى
