سقو-دا ەپيدەميولوگيالىق احۋالدى تۇراقتاندىرۋ ماقساتىندا 9 قاراشادان باستاپ بىرقاتار شەكتەۋ شارالارى ەنگىزىلەتىنى تۋرالى اقپارات جاريالاندى، - دەپ حابارلايدى «ادىرنا» ۇلتتىق پورتالى قر پرەمەر-ءمينيسترىنىڭ رەسمي اقپاراتتىق رەسۋرسىنا سىلتەمە جاساپ.
COVID-19-دىڭ تارالۋىنا جول بەرمەۋ ماسەلەلەرى جونىندەگى ۆەدومستۆوارالىق كوميسسيانىڭ توراعاسى، پرەمەر-ءمينيستردىڭ ورىنباسارى ەرالى توعجانوۆ جۇمىس ساپارىمەن سولتۇستىك قازاقستان وبلىسىنا باردى. ۆيتسە-پرەمەر الدىمەن وبلىستىق كوپسالالى بالالار اۋرۋحاناسىندا بولىپ، ءوڭىردىڭ كوروناۆيرۋس ينفەكتسياسىنىڭ ەكىنشى تولقىنىنا دايىندىعى بويىنشا جۇمىستارىن تەكسەردى. سونداي-اق ەلدىڭ وڭتۇستىك جانە باتىس وڭىرلەرىنەن كەلگەن جاس مەديتسينا قىزمەتكەرلەرىمەن كەزدەسۋ وتكىزدى. جۇمىس ساپارى بارىسىندا ۆيتسە-پرەمەر وڭىردەگى ەپيدەميولوگيالىق جاعداي بويىنشا وبلىس باسشىلىعىمەن كەڭەس وتكىزدى، وبلىس اكىمى قۇمار اقساقالوۆتىڭ، جەرگىلىكتى مەملەكەتتىك ورگاندار باسشىلارىنىڭ قابىلدانىپ جاتقان شارالار تۋرالى ەسەبىن تىڭدادى. پرەمەر-ءمينيستردىڭ ورىنباسارى وڭىردە تىركەلگەن سOVID-19 فاكتىلەرى سانىنىڭ ارتىپ وتىرعانىن اتاپ ءوتتى. وبلىستىڭ كەيبىر اۋداندارىندا كوروناۆيرۋس ينفەكتسياسىمەن اۋىرۋ وتكەن ايمەن سالىستىرعاندا 4,7 ەسە وسكەن. ۆيتسە-پرەمەر جەرگىلىكتى بيلىك ورگاندارىنىڭ ايماقتاعى ەپيدەميولوگيالىق جاعدايدى تۇراقتاندىرۋعا كۇش جۇمىلدىرۋ قاجەتتىگىن اتاپ ءوتتى. COVID-19-دى شەتەلدەن جۇقتىرىپ كەلۋ جاعدايلارىنىڭ جالعاسىپ جاتقانىن ەسكەرە وتىرىپ، ۆەدومستۆوارالىق كوميسسيا بيىلعى 9 قاراشادان باستاپ حالىقارالىق ەكى جاقتى جانە ترانزيتتىك جۇك تاسىمالدارىن جۇزەگە اسىراتىن جۇرگىزۋشىلەر (شەتەلدىك جانە قازاقستان رەسپۋبليكاسى ازاماتتارى) ءۇشىن تەرىس ناتيجەسى بار پتر تەستىلەۋ تۋرالى انىقتامانى (بەرىلگەن ساتتەن باستاپ 3 تاۋلىكتەن اسپايتىن) مىندەتتى تۇردە ۇسىنۋ جونىندەگى تالاپتى ەنگىزۋ تۋرالى شەشىم قابىلدادى. قازاقستان ازاماتتارىنىڭ مۇنداي انىقتاماسى بولماعان جاعدايدا، جۇك تاسىمالداۋشىلار پتر-تەست ناتيجەلەرى دايىن بولعانعا دەيىن 2 تاۋلىككە كارانتينگە ورنالاستىرىلاتىن بولادى. سونىمەن قاتار ۆەدومستۆوارالىق كوميسسيا وبلىس اكىمدىگىنە وسى جىلدىڭ 9 قاراشاسىنان باستاپ بىرقاتار شەكتەۋ شارالارىن قابىلداۋدى، اتاپ ايتقاندا: پەتروپاۆل قالاسىندا قالانىڭ پەريمەترى بويىنشا بلوك-بەكەتتەر ورناتا وتىرىپ كارانتين ەنگىزۋدى; كۇن سايىنعى ءوسىمى 10-نان استام جاعدايدى قۇرايتىن ەلدى مەكەندەردە سانيتارلىق بلوك-بەكەتتەر ورناتۋدى; پەتروپاۆل ‒ الماتى باعىتى بويىنشا تەمىرجول تاسىمالدارىن اپتاسىنا 7-دەن 3 رەتكە دەيىن قىسقارتۋدى; وبلىس ىشىندە جولاۋشىلار تەمىر جول قۇرامدارىنىڭ ايالداۋىنا تىيىم سالۋدى; پەتروپاۆل قالاسىنان شىعاتىن اۋە جولاۋشىلارى ءۇشىن تەرىس ناتيجەسى بار پتر انىقتاماسىنىڭ (بەرىلگەن ساتتەن باستاپ 3 تاۋلىكتەن اسپايتىن) بولۋىن مىندەتتەۋدى; ءدىني وبەكتىلەردىڭ، تەاترلاردىڭ، كينوتەاترلاردىڭ، مادەنيەت وبەكتىلەرىنىڭ قىزمەتىن توقتاتا تۇرۋدى; جۇمىس كۇندەرى: ءۇي-جايلارداعى قوعامدىق تاماقتاندىرۋ وبەكتىلەرىنىڭ جۇمىسىن ءبىر مەزگىلدە 30-دان اسپايتىن كەلۋشىلەر بولعان جاعدايدا، 30-دان كەم ورىندى وبەكتىلەر ءۇشىن ەسەپتىك ورىنداردىڭ 50%-ىنان اسپايتىن جاعدايدا ساعات 8.00-دەن 21.00-گە دەيىن شەكتەۋدى; ساۋدا ۇيلەرى، ساۋدا ورتالىقتارى، اۋدانى 500 شارشى مەتردەن استام ازىق-تۇلىكتىك ەمەس دۇكەندەر جۇمىسىن ساعات 10:00-دەن 20:00-گە دەيىن شەكتەۋدى; دەمالىس كۇندەرى قوعامدىق تاماقتانۋ وبەكتىلەرىنىڭ جۇمىسىن تاپسىرىس بەرۋشىگە جەتكىزۋ نىسانىنا اۋىستىرۋ ارقىلى ساعات 08:00-دەن 21:00 ساعاتقا دەيىن شەكتەۋدى; دەمالىس جانە مەرەكە كۇندەرى ساۋدا ۇيلەرى، ساۋدا ورتالىقتارى، اۋدانى 500 شارشى مەتردەن اساتىن ازىق-تۇلىكتىك ەمەس دۇكەندەر جۇمىسىن شەكتەۋدى; جەكسەنبى كۇندەرى سۇلۋلىق سالوندارىنىڭ، شاشتارازداردىڭ، باسسەيندەردىڭ، فيتنەس-كلۋبتاردىڭ، جاتتىعۋ زالدارىنىڭ جۇمىستارىن شەكتەۋدى; وفلاين كەڭەستەر وتكىزۋگە تىيىم سالۋدى; قىزمەتكەرلەردىڭ كەمىندە 80%-ىن قاشىقتان جۇمىس جاساۋ فورماتىنا اۋىستىرۋدى قامتاماسىز ەتۋدى; اۋەجايلارعا، تەمىر جول ۆوكزالدارىنا كۇتىپ الاتىن جانە شىعارىپ سالاتىن تۇلعالاردى كىرگىزۋگە تىيىم سالۋدى (بيلەت بولعان جاعدايدا عانا وتكىزۋدى); 65 جاستان اسقان ادامدارعا ازىق-تۇلىكتى، ءبىرىنشى كەزەكتە قاجەتتى تاۋارلاردى، ءدارى-دارمەكتەردى جانە مەديتسينالىق بۇيىمداردى ساتىپ الۋ جاعدايلارىن قوسپاعاندا، اسا قاجەتتىلىكسىز تۇرعىلىقتى جەرىنەن شىقپاۋدى ۇسىنۋدى; كارانتين رەجيمىن ساقتاۋ جونىندەگى مونيتورينگتىك توپتاردىڭ جۇمىسىن، اتاپ ايتقاندا پەتروپاۆل قالاسى، ايىرتاۋ، اققايىڭ، اقجار اۋداندارىندا كۇشەيتۋدى; كارانتين رەجيمىن ساقتاۋ قاجەتتىلىگى تۋرالى حالىق اراسىندا اقپاراتتىق-ءتۇسىندىرۋ جۇمىستارىن كۇشەيتۋدى; وبلىس تۇرعىندارىن پتر تەستىلەۋمەن قامتۋ كولەمىن ارتتىرۋدى تاپسىرعان.
سونداي-اق پرەمەر-ءمينيستردىڭ ورىنباسارى 200 ورىندىق جاڭا مودۋلدىك ينفەكتسيالىق اۋرۋحانانىڭ اشىلۋىنا قاتىسقان.
وڭىردەگى ەپيدەميولوگيالىق جاعداي ۇكىمەتتىڭ تۇراقتى باقىلاۋىندا.
فوتو اشىق دەرەككوزدەن الىندى
«ادىرنا» ۇلتتىق پورتالى
