ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ىندەت قاۋپىنەن ساقتانىپ، قيىن كەزەڭدە تۇسىنىستىك پەن بىرلىك تانىتۋعا شاقىردى. تەاتر اكتەرلەرى وسىعان وراي ۆيدەوروليك تۇسىرگەن، دەپ حابارلايدى قازاقپارات ءتىلشىسى. «دەرت كوپ. دەنساۋلىق بىرەۋ»، «اۋىرىپ ەم ىزدەگەنشە اۋىرمايتىن جول ىزدە»، «ءبىزدىڭ باستى بايلىعىمىز – ول مىقتى دەنساۋلىعىمىز»، «دوس-جاران اۋىرىپ قالعاندا سەلسوق جۇرەرسىڭ، الەككە اۋرۋ سالعاندا قادىرىن جاننىڭ بىلەرسىڭ»، «اۋرۋ باتپانداپ كىرىپ، مىسقىلداپ شىعادى» دەپ حالىققا ۇندەۋ تاستاعان تەاتر اكتەرلارى ىندەت قايتادان ورشيتىندەي سيپات تانىتىپ كەلە جاتقانىن ەسكەرتتى.
ارىپتەستەرىنىڭ ءسوزىن قولداعان تەاتر ديرەكتورى ازامات ساتىبالدى ءۇش نارسەنىڭ، داۋدىڭ، جاۋدىڭ جانە قايتادان قوزعان اۋرۋدىڭ الدىن الۋ كەرەكتىگىن ايتتى. «اسا قادىرلى اعايىن! قازاقتا «اۋىرىپ ەم ىزدەگەنشە اۋىرمايتىن جول ىزدە» دەگەن ءسوز بار. اۋرۋ ايتىپ كەلمەيدى. قازىر ەلىمىزدىڭ باسىندا ءوتىپ جاتقان ىندەت بارىمىزگە سىن. ايتەۋىر امان-ەسەن بىرىنشىسىنەن وتتىك. ءيا، قيىندىقتار مەن قازالار بولدى. جاقىندارىمىزدان ايىرىلدىق. ول ەندى اللانىڭ ءامىرى. ەشكىم قارسى كەلە المايدى. دەسە دە، «ساقتانساڭ ساقتايدى» دەيدى اتام قازاق. ال ەندى قازىر جاڭالىقتاردان پاندەميانىڭ قايتادان كۇشىنە ەنگەنىن كورىپ جاتىرسىزدار. وسى ىندەتتەن امان-ەسەن شىعايىق. ول ءۇشىن ساقتىق قانا كەرەك. كوپ ادام شوعىرلانعان جەرگە بارماي، ءتىپتى ءوزىڭدى عانا ەمەس، وزگەنى دە اۋىرتپاۋىڭ كەرەك. سول ءۇشىن ءاربىر ادام بۇعان جاۋاپكەرشىلىكپەن قاراۋى ءتيىس. مەن بارشا كورەرمەندى، اعايىن-تۋىستى، ەلدى، جۇرتتى ساقتانۋعا شاقىرامىن. ساقتىق شارالارىن ۇستانىڭىزدار. بىرىككەندە، ءبىر بولعاندا، ءبىر جاعادان باس، ءبىر جەڭنەن قول شىعارعاندا عانا جەڭەمىز. سول ءۇشىن بارشاڭىزدى ساقتىق شارالارىن ساقتاپ، امان-ەسەن بولۋىڭىزدى تىلەيمىن. ەلىمىز امان، جۇرتىمىز تىنىش بولعاي»، - دەيدى ازامات ساتىبالدى.
