Ǵ. Músirepov atyndaǵy qazaq memlekettik akademııalyq balalar men jasóspirimder teatry indet qaýpinen saqtanyp, qıyn kezeńde túsinistik pen birlik tanytýǵa shaqyrdy. Teatr akterlery osyǵan oraı vıdeorolık túsirgen, dep habarlaıdy QazAqparat tilshisi. «Dert kóp. Densaýlyq bireý», «Aýyryp em izdegenshe aýyrmaıtyn jol izde», «Bizdiń basty baılyǵymyz – ol myqty densaýlyǵymyz», «Dos-jaran aýyryp qalǵanda selsoq júrersiń, álekke aýrý salǵanda qadirin jannyń bilersiń», «Aýrý batpandap kirip, mysqyldap shyǵady» dep halyqqa úndeý tastaǵan teatr akterlary indet qaıtadan órshıtindeı sıpat tanytyp kele jatqanyn eskertti.
Áriptesteriniń sózin qoldaǵan teatr dırektory Azamat Satybaldy úsh nárseniń, daýdyń, jaýdyń jáne qaıtadan qozǵan aýrýdyń aldyn alý kerektigin aıtty. «Asa qadirli aǵaıyn! Qazaqta «aýyryp em izdegenshe aýyrmaıtyn jol izde» degen sóz bar. Aýrý aıtyp kelmeıdi. Qazir elimizdiń basynda ótip jatqan indet bárimizge syn. Áıteýir aman-esen birinshisinen óttik. Iá, qıyndyqtar men qazalar boldy. Jaqyndarymyzdan aıyryldyq. Ol endi Allanyń ámiri. Eshkim qarsy kele almaıdy. Dese de, «saqtansań saqtaıdy» deıdi atam qazaq. Al endi qazir jańalyqtardan pandemııanyń qaıtadan kúshine engenin kórip jatyrsyzdar. Osy indetten aman-esen shyǵaıyq. Ol úshin saqtyq qana kerek. Kóp adam shoǵyrlanǵan jerge barmaı, tipti ózińdi ǵana emes, ózgeni de aýyrtpaýyń kerek. Sol úshin árbir adam buǵan jaýapkershilikpen qaraýy tıis. Men barsha kórermendi, aǵaıyn-týysty, eldi, jurtty saqtanýǵa shaqyramyn. Saqtyq sharalaryn ustanyńyzdar. Birikkende, bir bolǵanda, bir jaǵadan bas, bir jeńnen qol shyǵarǵanda ǵana jeńemiz. Sol úshin barshańyzdy saqtyq sharalaryn saqtap, aman-esen bolýyńyzdy tileımin. Elimiz aman, jurtymyz tynysh bolǵaı», - deıdi Azamat Satybaldy.
