جەنەۆادا ورنالاسقان بۇۇ ادام قۇقىعى جونىندەگى كەڭەسى بەلارۋس بيلىگىنىڭ "ادام قۇقىعىن قورعاۋ بويىنشا اتقارعان ىستەرىن" قۇپتادى دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
2 قاراشادا بەلارۋس دەلەگاتسياسى كەڭەس مۇشەلەرىنە بەلارۋستاعى ادام قۇقىعى بويىنشا اتقارىلعان شارۋالار جايلى پەريوديكالىق ەسەبىن تانىستىرعان. كەڭەسكە مۇشە ەلدەردىڭ بارلىعى بەس جىل سايىن وسىنداي ەسەپ بەرىپ وتىرۋعا مىندەتتى.
تالقىلاۋ كەزىندە UN Watch ۇكىمەتتىك ەمەس قۇقىق قورعاۋ ۇيىمى بايانداما جاسادى. 1993 جىلى قۇرىلعان ۇيىم بۇۇ شەشىمدەرىنىڭ جارعىعا سايكەستىگىن، تيىمدىلىگىن تەكسەرەدى.
UN Watch مالىمەتىنشە، ادام قۇقىعى جونىندەگى كەڭەسكە مۇشە 92 ەلدىڭ 51-ءى (55 پايىزى) بەلارۋستىڭ "ادام قۇقىعى سالاسىندا جەتكەن جەتىستىكتەرىن" قولداعان.
لۋكاشەنكو رەجيمىنىڭ ارەكەتىن قولداعاندار اراسىندا رەپرەسسيۆتى رەجيمدەردى ۇنەمى دەمەپ، قولداپ وتىراتىن 36 مەملەكەت بار. بۇعان قوسا، 15 مەملەكەت بەلارۋس بيلىگىنىڭ كەيبىر جەتىستىكتەرىنە وڭ باعا بەرۋگە بولادى دەپ ساناعان.
"لۋكاشەنكو رەجيمى پرەزيدەنت سايلاۋىنىڭ رەسمي قورىتىندىسىمەن كەلىسپەيتىن ازاماتتاردىڭ نارازىلىعىن كۇشپەن باسىپ، كوشەدە ايەلدەردى ۇرىپ-سوعىپ، وپپوزيتسيا جەتەكشىلەرىن تۇرمەگە قاماپ، ەلدەن كەتىرۋگە ماجبۇرلەپ وتىرعان شاقتا بۇۇ-نىڭ نەگىزگى قۇقىق قورعاۋ ورگانى قاناۋشىلاردى وتىرىك ماقتايتىن فورۋمعا اينالماۋى ءتيىس" دەدى UN Watch تاۋەلسىز قۇقىق قورعاۋ ۇيىمىنىڭ اتقارۋشى ديرەكتورى حيلەل نويەر.
دەگەنمەن ول 41 مەملەكەتتىڭ قىسقا سويلەپ شىعۋ قۇقىعىن پايدالانىپ، بەلارۋستاعى ادام قۇقىعى جاعدايىنا شىنايى باعا بەرۋىن قۇپتادى.
