قازاقستاننىڭ ەڭبەك سىڭىرگەن ءارتىسى مايرا ءىلياسوۆ قازاقستان حالقىن كارانتين شارالارىن ساقتاۋعا شاقىردى، دەپ حابارلايدى قازاقپارات ءتىلشىسى.
«قىمباتتى اعايىن، قازاقستان حالقى! قازىرگى كەزدە كوروناۆيرۋستىڭ ورشۋىنە بايلانىستى كارانتين شارالارى قاتاڭداتىلعانىمەن، تۇرعىندارىمىزدىڭ قاۋىپسىزدىكتى ساقتاماۋى سالدارىنان ادام ومىرىنە قاۋىپتى جاعدايلار ءجيى كەزدەسىپ جاتىر. بۇگىندە شىعىس قازاقستان، سولتۇستىك قازاقستان وبلىستارىندا كوروناۆيرۋسپەن اۋىرعان ادام سانى كوپتەپ انىقتالىپ جاتىر. سوندىقتان سىزدەردەن كارانتين شارالارىن ساقتاۋلارىڭىزدى ءوتىنىپ سۇرايمىز. ماسكا كيىپ، قولدى ءجيى جۋىپ تۇرۋ كەرەك. قولدى سابىنمەن 30-40 سەكۋند جاقسىلاپ جۋسا دا ارتىق ەتپەيدى. وزدەرىڭىزبەن بىرگە ۇنەمى سانيتايزەر الىپ جۇرىڭىزدەر. ونىمەن قولدى ۇنەمى تازالاپ وتىرعان ءجون. مۇمكىندىگىنە ادامدار كوپ جينالاتىن جەرگە بارماعان ابزال. توي-تومالاق جاساۋدى دا دوعارى تۇرعانىمىز دۇرىس بولار ەدى»، - دەدى «قۇرمەت»، «پاراسات» وردەندەرىنىڭ يەگەرى.
سونىمەن قاتار قر ەڭبەك سىڭىرگەن ءارتىسى اعايىن-تۋىسىمىزعا، بالالارىمىزعا، جاستارىمىزعا كوروناۆيرۋس قاۋپىن ءتۇسىندىرىپ وتىرۋىمىز كەرەكتىگىن باسا ايتادى. «ءبىز سىزدەرمەن بىرگەمىز. ونەر ادامدارى وزدەرىڭىزدى جاقسى كورەدى. ەلىمىز امان، جۇرتىمىز تىنىش بولسىن! اماندىقتا جولىعايىق، امان بولىڭىزدار!»، - دەيدى مايرا ءىلياسوۆا.
