Qazaqstannyń eńbek sińirgen ártisi Maıra Ilııasov Qazaqstan halqyn karantın sharalaryn saqtaýǵa shaqyrdy, dep habarlaıdy QazAqparat tilshisi.
«Qymbatty aǵaıyn, Qazaqstan halqy! Qazirgi kezde koronavırýstyń órshýine baılanysty karantın sharalary qatańdatylǵanymen, turǵyndarymyzdyń qaýipsizdikti saqtamaýy saldarynan adam ómirine qaýipti jaǵdaılar jıi kezdesip jatyr. Búginde Shyǵys Qazaqstan, Soltústik Qazaqstan oblystarynda koronavırýspen aýyrǵan adam sany kóptep anyqtalyp jatyr. Sondyqtan sizderden karantın sharalaryn saqtaýlaryńyzdy ótinip suraımyz. Maska kıip, qoldy jıi jýyp turý kerek. Qoldy sabynmen 30-40 sekýnd jaqsylap jýsa da artyq etpeıdi. Ózderińizben birge únemi sanıtaızer alyp júrińizder. Onymen qoldy únemi tazalap otyrǵan jón. Múmkindigine adamdar kóp jınalatyn jerge barmaǵan abzal. Toı-tomalaq jasaýdy da doǵary turǵanymyz durys bolar edi», - dedi «Qurmet», «Parasat» ordenderiniń ıegeri.
Sonymen qatar QR Eńbek sińirgen ártisi aǵaıyn-týysymyzǵa, balalarymyzǵa, jastarymyzǵa koronavırýs qaýpin túsindirip otyrýymyz kerektigin basa aıtady. «Biz sizdermen birgemiz. Óner adamdary ózderińizdi jaqsy kóredi. Elimiz aman, jurtymyz tynysh bolsyn! Amandyqta jolyǵaıyq, aman bolyńyzdar!», - deıdi Maıra Ilııasova.
