ەلىمىزدىڭ ءار وڭىرىندەگى مۇعالىمدەردىڭ جالاقىسى سوڭعى ۋاقىتتا تۇتاس بەرىلمەي وتىر. بۇل تۋرالى اقپاراتتى ءوزىمىز بىلەتىن مۇعالىمدەر دە راستادى. سونىمەن قاتار كۇنى كەشە Facebook الەۋمەتتىك جەلىسىندەگى «قازاقستان ۇستازدارى» توبىندا دا وسى ماسەلە تالقىعا ءتۇستى.
«پەداگوگتاردىڭ ەڭبەكاقىسىن ءبولىپ -جارماي تولىق الاتىن كۇن قاشان تۋادى؟نەسيە ۇستىندە وتىرعانىمىزدى بىلمەيدى- اۋ دەيمىن؟وسى توپتىڭ سۇلتان اعاي باستاعان مىقتىلارى ايلىق جونىندە مينيسترگە حات جولدايىق. نەگە بىزدەر مەستنىي بيۋدجەت،رەسپۋبل.بيۋدجەت دەپ باس قاتىرۋىمىز كەرەك؟ادال ەڭبەگىمىزدىڭ اقىسى نەگە ۋاقىتىلى تولەنبەي وتىر؟وقۋ جوسپارى الدىن- الا بەكىتىلدى،بيۋدجەت اقشاسى ءبولىندى.كىم ،نە سەبەپتى ۇستاپ وتىر ايلىقتى؟...ءبولىپ-جارىپ العاسىن دا پريحود- راسسحود ەسەپتەۋگە دە كوڭىلىڭ بولمايدى ەكەن.قىلىشىن سۇيرەتە قىس كەلە جاتىر،وتىن-سۋىمىز بەن بالا شاعامىزدىڭ كيىم- كەشەگى،كۇزگى جيىن-تەرىننىڭ ونىمدەرىن جىلدا وسى ۋاقىتتا الىپ الۋشى ەدىك.بيىل ءبولىنىپ-ءبولىنىپ بەرىلگەن ايلىقتان بەرەكەمىز كىرمەي تۇر....الدە ۇستازداردا ارتىق اقشا،ينۆەستيتسيا بار دەپ ويلاي ما ەكەن وكىمەت؟بار اقشانى يپوتەچنىي نەسيەگە قۇيىپ،اش وتىرمىز! تۋرا ماعاناسىندا «اشپىز!» دەپ جازدى ەلىمىزدىڭ مۇعالىمدەرى. وسى جازبانىڭ استىنا قالدىرىلعان پىكىرلەردى وقىپ، بۇل پروبلەما ءبىر عانا وڭىردە بولىپ جاتپاعانىنا كوزىڭىز جەتەدى.
تاياۋدا عانا رەداكتسيامىزعا پاۆلودار وبلىسى، ەكىباستۇز قالاسىنداعى بىرنەشە مۇعالىم حابارلاسىپ، جالاقىلارىنىڭ جىرىمدالىپ، ءبولىنىپ ءتۇسىپ جاتقانىن ايتىپ شاعىمدانعان ەدى. «جازعى ەڭبەك دەمالىسىمىزدىڭ اقشاسى ازايىپ تۇسكەنىمەن قويماي، بىرنەشە ءبولىنىپ ءتۇسىپ ابدەن يت بولعانبىز. ەندى مىنە، تامىز، قىركۇيەك ايلارىنىڭ جالاقىسىن دا قولىمىزعا تۇتاس الا الماي وتىرمىز» دەيدى پاۆلودارلىق ۇستازدار. وكىنىشكە قاراي، اتىن اتاماۋدى وتىنگەن مۇعالىمدەر كىمنەن كومەك سۇرارىن بىلمەي وتىرعانىن دا جاسىرماعان.
وسى تاقىرىپقا بايلانىستى جازىلعان پىكىرلەردە تۇركىستان وبلىسىنداعى بىرنەشە مەكتەپتىڭ ۇستازدارى ءبىر جالاقىسىن ۇشكە ءبولىپ العانى ايتىلادى. ءدال سونداي جاعداي قاراعاندى، جامبىل وبلىستارىندا دا جالعاسىپ جاتىر ەكەن. بۇل قالاي؟الدە كوروناۆيرۋستىڭ قازاقستاندىق كولەڭكەسىمەن «كۇرەسەمىز» دەپ بيۋدجەتتىڭ ءبۇيىرى تەسىلدى مە؟ ۆيرۋستىڭ كولەڭكەسى دەپ بەكەر ايتىپ وتىرعانىمىز جوق. ەگەر شەنەۋنىكتەر «ۇمىتىپ» قالسا، ەسكە سالىپ وتەيىك. بيىلعى بيۋدجەتتىڭ باسىم بولىگى «كوۆيدپەن كۇرەسكە» دەگەن جەلەۋمەن جەلگە ۇشىپ جاتقانى وتىرىك ەمەس. ال كوۆيدپەن قالاي كۇرەسكەنىمىزگە وسى جىلدىڭ شىلدە ايىندا كوزىمىز انىق جەتكەن. ميللياردتاعان اقشا بولىنگەن بۇل كوۆيدىڭىز قازاق دالاسىنا «ارنايى شاقىرتۋمەن» شىلدە ايىندا كەلىپ، جۇرت قاراپايىم عانا اسپيرين تاپپاي ءدارىحانا جاعالاپ كەتكەن ەدى. مۇنى مۇعالىمدەردىڭ جالاقىسى تىكەلەي بيۋدجەتتەن بولىنەتىن قاراجات بولعاندىقتان ەسكە سالىپ وتىرمىز. بيۋدجەتتە اقشا جوعىنان ۇستازدارىمىزدىڭ جالاقىسى جىرىمدالىپ جاتسا، سول بيۋدجەتتىڭ اقشاسى ناقتى نەگە جۇمسالعانىنا بيلىكتەگىلەر ەسەپ بەرۋى كەرەك شىعار، قالاي ويلايسىز؟
ەلىمىزدەگى ءاربىر وتباسىنىڭ نەگىزگى اسىراۋشىسى بۇل كۇندە دارىگەر مەن مۇعالىم ەكەنى شىندىق. وتباسىلىق شىعىنداردىڭ ەڭ كوپ بولىگىن ۇستاز بەن دارىگەردىڭ جالاقىسى جاباتىنى تاعى دا اقيقات. ال سول ۇستازداردىڭ ايلىعى الگىندەي ۇشكە ءبولىنىپ تولەنىپ جاتسا، نە بولعانى؟ قازاقستاننىڭ ءوزى عانا ەمەس، تۇتاس حالقى دا قارىزعا بەلشەسىنەن باتپاي ما، مىناداي جاعدايدان سوڭ. اي سايىن تولەيتىن نەسيەسى، كوممۋنالدى شىعىندارى ۇستازدارعا «جالاقىڭدى ءبولىپ ءتۇسىرىپتى، جارايدى، سەن دە قارىزىڭدى ءبولىپ قايتار» دەپ جاعداي جاساي ما؟ ارينە، جاسامايدى. ەشبىر بانك نەسيەنى كەشىكتىرىپ تولەگەن كليەنتتىڭ باسىنان سيپاي قويمايدى.
ۇكىمەت پەن ءبىلىم جانە عىلىم مينيسترلىگى ەلىمىزدەگى ۇستازداردىڭ وسىناۋ جانايقايىنا قۇلاق تۇرەدى دەپ سەنەمىز. قىلىشىن سۇيرەتىپ قىس كەلە جاتىر. وتىنى مەن سۋىن قامدايتىن ۋاقىتتا ۇستازدارىمىز جىرىمدالعان جالاقىسىنىڭ تيىنىن ساناپ، قينالا باستادى. بۇل پروبلەمانى شۇعىل رەتتەپ، جاعدايدى ۋشىقتىرماعان ابزال. ويتكەنى مۇعالىمدەر باس كوتەرسە، بيلىك كوپ بالالى انالاردىڭ نارازىلىعىنا زار بولىپ قالارى بەسەنەدەن بەلگىلى.
مەرۋەرت حۋساينوۆا،
«ادىرنا» ۇلتتىق پورتالى.
فوتو اشىق دەرەككوزدەن الىندى.
