ەلوردا اۋماعىندا ارنايى وپەراتسيا بارىسىندا ەسىرتكى وتكىزۋمەن اينالىساتىن قىلمىستىق توپ ۇستالدى، دەپ حابارلايدى «ادىرنا» ۇلتتىق پورتالى نۇر-سۇلتان قالاسىنىڭ پوليتسيا دەپارتامەنتىنە سىلتەمە جاساپ.
ەلوردا اۋماعىندا ەسىرتكى زاتىن وتكىزبەكشى بولعان، بۇرىن ەسىرتكى قىلمىسى ءۇشىن سوتتالعان 27 جاسار كۇدىكتى قولعا تۇسكەن. ونىڭ اۆتوكولىگىن ءتىنتۋ بارىسىندا ولشەپ، وراپ وتكىزۋ ءۇشىن دايىنداپ قويعان، جالپى سالماعى 500 گرامنان اساتىن، ىشىندە «گاشيشى» بار سىرىڭكەنىڭ كوراپشالارى الىنىپ قويىلدى.
سونىمەن قاتار پوليتسەيلەر ەلورداعا ەسىركى زاتىن نەگىزگى جەتكىزۋشى بولىپ تابىلاتىن سىبايلاس ادامدى ۇستادى. ول بۇرىن سوتتى بولعان 34 جاستاعى جامبىل وبلىسىنىڭ تۋماسى بولىپ شىققان. ونىڭ پاتەرىن ءتىنتۋ بارىسىندا وق-دارىلەرى بار تىركەلمەگەن جاراقاتتاعىش قارۋ، ەلەكتروندى تارازى جانە ەسىرتكى زاتىن پايدالانۋعا ارنالعان قۇرىلعى الىنىپ قويىلدى. 2 ميلليون 150 مىڭ تەڭگە سوماسىنداعى اقشا قاراجاتى، وتكىزۋ ءۇشىن دايىنداپ قويعان ىشىندە «گاشيشى» بار 3 پوليەتيلەن پاكەت جانە 265 دانا ىشىندە ەسىرتكى زاتى بار ولشەنىپ، ورالعان سىرىڭكە قوراپتارى تابىلعان.
قازىرگى تاڭدا تەرگەۋ جۇمىستارى جۇرگىزىلۋدە.
«ادىرنا» ۇلتتىق پورتالى
