بۇگىن قاسىم-جومارت توقاەۆ قازاقستاندىقتارعا ۇندەۋ جولدادى. پرەزيدەنت مالىمدەمەسىنىڭ تولىق ءماتىنى اقوردانىڭ رەسمي سايتىندا جاريالاندى، دەپ حابارلايدى «ادىرنا» ۇلتتىق پورتالى.
مەملەكەت باسشىسىنىڭ جارلىعىمەن قر پارلامەنت ءماجىلىسى دەپۋتاتتارىنىڭ كەزەكتى سايلاۋى 2021 جىلدىڭ 10 قاڭتارىنا بەلگىلەندى.
قۇرمەتتى وتانداستار!
بۇگىن مەن پارلامەنت ءماجىلىسى دەپۋتاتتارىنىڭ سايلاۋىن تاعايىنداۋ تۋرالى جارلىققا قول قويدىم. ورتالىق سايلاۋ كوميسسياسىنىڭ قاۋلىسىمەن بارلىق دەڭگەيدەگى ءماسليحات دەپۋتاتتارىنىڭ سايلاۋى تاعايىندالادى.
الداعى سايلاۋ كونستيتۋتسيالىق مەرزىمگە سايكەس، 2021 جىلدىڭ 10 قاڭتارىندا وتەدى. بارلىق ساياسي پارتيالاردىڭ بۇل سايلاۋ ناۋقانىنا قاتىسۋعا دايىندالۋىنا، سايلاۋ الدىنداعى پلاتفورماسىن ازىرلەۋىنە، پارتيالىق ينفراقۇرىلىمداردى جەتىلدىرۋىنە ۋاقىتى جەتكىلىكتى بولدى.
ورتالىق سايلاۋ كوميسسياسى مەن باس پروكۋراتۋرا سايلاۋدىڭ زاڭدىلىعىن، اشىقتىعىن جانە ادىلدىگىن ساقتاۋ ءۇشىن تۇراقتى باقىلاۋ جۇرگىزىپ وتىرادى.
جاڭا سايلاۋ ناۋقانىنا دەيىن ساياسي جاڭعىرۋ، كوپپارتيالىقتى دامىتۋ جانە ەلىمىزدىڭ قوعامدىق-ساياسي ومىرىنە ازاماتتاردىڭ قاتىسۋ اياسىن كەڭەيتۋ جونىندە شارالار قابىلداندى.
ءبىرىنشى. «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭعا جانە «قازاقستان رەسپۋبليكاسى پارلامەنتىنىڭ كوميتەتتەرى مەن كوميسسيالارى تۋرالى» زاڭعا تۇزەتۋلەر ەنگىزۋ ارقىلى پارلامەنتتىك وپپوزيتسيا ينستيتۋتىن قۇرۋ ماسەلەسىن قاراستىراتىن جانە ونىڭ قىزمەتىن رەگلامەنتتەيتىن وزگەرىستەر مەن تولىقتىرۋلار جاسالدى.
ەندى پارلامەنت ءماجىلىسى تۇراقتى كوميتەتتەرىنىڭ ءبىر توراعاسى مەن ەكى حاتشىسى پارلامەنتتىك وپپوزيتسيا دەپۋتاتتارى اراسىنان سايلانادى.
سونىمەن قاتار، پارلامەنتتىك وپپوزيتسيا ءبىر سەسسيا كەزىندە كەمىندە ءبىر رەت پارلامەنتتىك تىڭداۋ وتكىزۋ جونىندە باستاما كوتەرۋ قۇقىعىن يەلەنەدى. سونداي-اق ءبىر سەسسيا كەزىندە كەمىندە ەكى رەت ۇكىمەت ساعاتىنىڭ كۇن ءتارتىبىن ايقىندايتىن بولادى.
بۇدان بولەك، ساياسي پارتيالار فراكتسيالارىنىڭ جەتەكشىلەرىنە پارلامەنت پالاتالارىنىڭ بىرلەسكەن وتىرىستارىندا، پارلامەنت ءماجىلىسىنىڭ پلەنارلىق وتىرىستارىندا، تۇراقتى كوميتەتتەردىڭ، جۇمىس توپتارىنىڭ وتىرىستارىندا، پارلامەنتتىك تىڭداۋلاردا جانە باسقا ءىس-شارالاردا ءسوز سويلەۋگە كەپىلدى قۇقىق بەرىلەدى.
ەكىنشى. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭدا جانە «ساياسي پارتيالار تۋرالى» زاڭدا قاراستىرىلعان ەرەجەلەر بويىنشا پارلامەنتتىك تاجىريبەمىزدە العاش رەت پارتيالىق تىزىمگە ايەلدەر مەن جاستار ءۇشىن 30 پايىزدىق كۆوتا ەنگىزىلدى. بۇل نورما پارلامەنتكە جانە جەرگىلىكتى وكىلدى ورگاندارعا ايەلدەر مەن جاستاردى تارتۋدىڭ ءتيىمدى جولى رەتىندە ولاردىڭ ەلىمىزدەگى قوعامدىق-ساياسي ۇدەرىستەرگە بەلسەندى قاتىسۋىنا سەپتىگىن تيگىزەدى.
ءۇشىنشى. الداعى ءماسليحاتتار سايلاۋى العاش رەت پارتيالىق ءتىزىم بويىنشا وتەدى. پروپورتسيونالدى مودەل الەمدىك دەموكراتيالىق تاجىريبەگە تولىق ساي كەلەدى، ساياسي جۇيەنى نىعايتۋعا، دەموكراتيانى دامىتۋعا ىقپال ەتەدى، ساياسي پارتيالاردىڭ جۇمىسىن جانداندىرادى.
بۇل جاڭا باستامالار پارتيالارعا ەلىمىزدىڭ ساياسي جۇيەسىندەگى ۇستانىمىن نىعايتۋ ءۇشىن قوسىمشا مۇمكىندىكتەر بەرەدى.
***
كوروناۆيرۋس پاندەمياسى سالدارىنان تۋىنداعان كۇردەلى ەكونوميكالىق داعدارىس كوپتەگەن ەلدى قامتىدى، سونداي-اق، بۇكىل الەمدىك ەكونوميكاعا كەرى اسەر ەتتى.
قازىرگى كۇردەلى كەزەڭدە قازاقستاننىڭ الدىندا داعدارىسقا قارسى ءتيىمدى شارالار قابىلداۋ، ورنىقتى ەكونوميكالىق دامۋدى جانە ازاماتتارىمىزدىڭ الەۋمەتتىك يگىلىگىن قامتاماسىز ەتۋ، حالىقتىڭ ءال-اۋقاتىن ارتتىرۋ مىندەتى تۇر.
وسى باسىمدىقتار جونىندە مەنىڭ قازاقستان حالقىنا ارناعان جولداۋىمدا ايتىلدى.
پارلامەنتتىڭ جانە جەرگىلىكتى وكىلدى ورگانداردىڭ جاڭارتىلعان قۇرامى ەلىمىزدەگى الەۋمەتتىك-ەكونوميكالىق رەفورمالاردى ساپالى ءارى زاڭنامالىق تۇرعىدان قامتاماسىز ەتۋگە باسا ءمان بەرەدى.
الداعى سايلاۋ ەلىمىزدىڭ ساياسي جۇيەسىن جاڭارتۋدى قامتاماسىز ەتەتىن ساياسي ينستيتۋتتاردى دايەكتى تۇردە دەموكراتيالاندىرۋعا جانە جاڭعىرتۋعا قازاقستاننىڭ اسا ىقىلاستى ەكەنىن تاعى دا ءبىر دالەلدەيتىن بولادى.
ءبىزدىڭ ورتاق ميسسيامىز – قازاقستاندى وركەندەتۋ، ازاماتتارىمىزدىڭ يگىلىگى ءۇشىن قىزمەت ەتۋ. قازاقستان حالقى اسا ماڭىزدى تاريحي سىندارلى ساتتەردە ءبىر جەڭنەن قول، ءبىر جاعادان باس شىعارا ءبىلدى. حالقىمىز وسى جولى دا ەلىمىزدى جان-جاقتى جاڭعىرتۋ باعىتىنداعى جاڭا تاريحي ميسسياسىن لايىقتى اتقارادى دەپ سەنەمىن. تاۋەلسىزدىكتىڭ 30 جىلدىعى قارساڭىندا ەلىمىز كەمەلدەنە ءتۇسىپ، دامۋدىڭ جاڭا كەزەڭىنە شىعاتىنىمىز انىق.
مەملەكەتىمىزدىڭ بارلىق ازاماتتارىن بەلسەندى ازاماتتىق ۇستانىمىن تانىتۋعا، پارلامەنت ءماجىلىسىنىڭ جانە ءماسليحاتتاردىڭ الداعى سايلاۋىنا ۇيىمشىلدىقپەن قاتىسۋعا شاقىرامىن»
«ادىرنا» ۇلتتىق پورتالى
