الماتى قالاسى قىلمىستىق-اتقارۋ جۇيەسى دەپارتامەنتىنە قاراستى تۇرمەلەردە جازاسىن وتەپ جاتقان جاندار ءۇشىن «ماڭگىلىك قازاقستان» قوعامدىق قورى ارنايى پسيحولوگيالىق ترەنينگ ۇيىمداستىردى. لا-155/6, لا-155/13, لا-155/18 تۇزەۋ مەكەمەلەرىندەگى ترەنينگ الماتى قالاسى قوعامدىق دامۋ باسقارماسىنىڭ قولداۋىمەن ءوتتى.
بارلىق ترەنينگتى پسيحولوگيا عىلىمدارىنىڭ كانديداتى، پراكتيك، قالاداعى داعدارىسقا قارسى ورتالىقتىڭ قىزمەتكەرى جاننا ياۆورسكايا جۇرگىزدى. ونىڭ ترەنينگ جۇرگىزۋ ءتاسىلى كەلەسىدەي: قاتىسۋشىلارعا قالام مەن قاعاز ۇسىنىپ بەلگىلى ءبىر تاقىرىپتا سۋرەت سالدىرادى، سوسىن سۋرەتكە قاراپ وتىرىپ، سۋرەتتى سالعان ادامنىڭ جان-دۇنيەسىنە باعا بەرىپ، ونىڭ پسيحولوگيالىق پورترەتىن جاسايدى. «شىن مانىندە سۋرەتتەر سىر شەرتەدى. ادامدار ىشكى كوڭىل-كۇيىن بارىنشا جاسىرعانىمەن، ول ءبارىبىر ءارتۇرلى كانالدارمەن سىرتقا شىعىپ، كورىنىس بەرەدى. سۋرەت سالۋ سونداي تاپتىرماس قۇرال. سۋرەتتەن اۆتوردىڭ ءتىپتى جان جاراسى، ۋايىمى، مىنەز-قۇلقى بايقالىپ تۇرادى» دەيدى پسيحولوگ حانىم.
ترەنينگتەر الدىن الا بەلگىلەنگەن تارتىپپەن جۇرگىزىلدى. جازاسىن وتەۋشى سۋرەت سالعانىمەن، اۆتور رەتىندە ءوزىنىڭ اتى-ءجونىن كورسەتپەيدى. بۇل تۇتقىن پسيحولوگيالىق قىسىمعا ۇشىراپ قالماسىن دەپ جاسالعان امال ەدى. سەبەبى سۋرەت اۆتورىنىڭ كىم ەكەنى بەلگىلى بولسا، وعان پسيحولوگيالىق پورترەت بەرىلىپ جاتقاندا باسقا سەرىكتەستەرى كەلەكە قىلۋى دا ىقتيمال ەدى. ج.ياۆورسكايانىڭ سوزىنشە جازاسىن وتەپ جاتقان ادامداردىڭ ىشكى جاي-كۇيى ءارتۇرلى. «مىسالى، مەن ولارعا كەز كەلگەن اڭ-قۇستىڭ، جان-جانۋاردىڭ سۋرەتىن سالىڭىزدار دەگەنىمدە، ءبىر تۇتقىن اققۋ مەن قولتىراۋىننىڭ سۋرەتىن قاتار سالدى. بۇل سۋرەت اۆتورىنىڭ قانىندا تەكتىلىك بولعانىن، الايدا ول جازا باسىپ، بويىنداعى جاقسى قاسيەتكە قيانات جاساپ العانىنا وكىنەتىنىن كورسەتەدى. تاعى ءبىر تۇرمەدە ترەنينگ وتكىزگەنىمدە قاتىسۋشىلاردان كەز كەلگەن ەرتەگى كەيىپكەرىن سۋرەتتەۋدى سۇرادىم. تۇتقىنداردىڭ ءبىرى ورىس ەرتەگىلەرىندەگى مىستان كەمپىردىڭ ءۇيىنىڭ سىرتقى كورىنىسىن سالىپتى. مەنىڭ ويىمشا بۇل سۋرەتتىڭ اۆتورى كوپ نارسەنى جاسىراتىن توماعا-تۇيىق كىسى. پسيحولوگتار مۇنداي ادامدارمەن كوپ اڭگىمەلەسۋ قاجەت. ايتپەسە ەرتەڭ ولار قايتا بوساپ شىققاننان كەيىن، تاعى دا زاڭ بۇزۋى مۇمكىن» دەيدى ول.
بارلىق تەرنينگتەردىڭ باسى-قاسىندا ۇيىمداستىرىپ جۇرگەن «ماڭگىلىك قازاقستان» قوعامدىق قورىنىڭ جوبا جەتەكشىسى بەيبىت نالىباەۆتىڭ ايتۋىنشا اتالعان ءىس-شارالار الماتى قالاسى قوعامدىق دامۋ باسقارماسىنىڭ قولداۋىمەن ىسكە اسىرىلىپ جاتىر ەكەن. «جوبا اياسىندا پسيحوالەۋمەتتىك باعدارلامالار ۇيىمداستىرۋ قاراستىرىلعان. پسيحولوگيالىق ترەنينگتەر سونىڭ ءبىر پاراسى. بۇدان بولەك جازاسىن وتەپ شىققاندارمەن دە وسىنداي جۇمىستار جۇرگىزىلىپ جاتىر» دەيدى ۇيىمداستىرۋشى.
ن.ناۋرىزاليەۆ
