الەم بويىنشا كوروناۆيرۋس پاندەمياسى دەندەپ بارادى، دەپ حابارلايدى «ادىرنا» ۇلتتىق پورتالى «حابار 24»-كە سىلتەمە جاساپ.
بۇل دەرتكە شالدىققانداردىڭ سانى 37 ميلليوننان اسىپ كەتتى. ءبىر ميلليوننان استام ناۋقاستىڭ قايتىس بولعانى حابارلاندى. ەۋروپا قۇرلىعىندا دا ىندەت ءورشىپ تۇر. مۇندا ەكىنشى تولقىننىڭ اۋقىمى كوكتەمگى جاعدايدان دا اسىپ كەتۋى مۇمكىن دەگەن بولجام بار. مىسالى، فرانتسيادا كۇن سايىن 16 مىڭنان اسا ناۋقاس تىركەلىپ كەلەدى. قاۋىپتىڭ ەڭ جوعارى دەڭگەيى جاريالانعان ايماقتار تىزىمىنە تاعى دا ءتورت قالا – ليون، ليلل، گرەنوبل جانە سەنت-ەتەن قوسىلدى. وسىعان دەيىن بۇل دەڭگەي پاريج، مارسەل قالالارى مەن گۆادەلۋپا ارالىندا جاريالانعان بولاتىن. ال ۇلىبريتانيادا سوڭعى ءبىر تاۋلىكتە 13 مىڭداي ناۋقاس انىقتالدى. ال كەسەلگە دۋشار بولعان جانداردىڭ سانى 600 مىڭنان استى. بۇگىن پرەمەر-مينيستر بوريس دجونسون جاڭا كارانتين شارالارىن جاريالاۋى مۇمكىن. اتاپ ايتقاندا، مەيرامحانالار مەن پابتار ۋاقىتشا جابىلاتىن سەكىلدى.
«اۋرۋدى جۇقتىرۋ دەرەگى تىركەلگەندە جەرگىلىكتى دەڭگەيدە شارالار قابىلداپ جاتقانىمىز دۇرىس دەپ سانايمىن. ەشكىم جالپىۇلتتىق شەكتەۋلەردىڭ قابىلدانۋىن قالامايدى. مۇنى بولدىرماۋدىڭ جولىن ىزدەپ جاتىرمىز»،-دەيدى ۇلىبريتانيا تۇرعىن ءۇي-كوممۋنالدىق شارۋاشىلىعىنىڭ ءمينيسترى
روبەرت دجەنريك.
رەسەي ناۋقاستار سانى بويىنشا الەمدە ءتورتىنشى ورىندا تۇر. كۇن سايىن جۇقتىرۋ دەرەكتەرى ارتىپ بارا جاتقاندىقتان، ماسكەۋ مەرى جەرگىلىكتى كومپانيالاردى قىزمەتكەرلەرىنىڭ 30% جانە جاسى 65-تەن اسقاندار مەن سوزىلمالى اۋرۋلارى بار ادامداردى قاشىقتان جۇمىس ىستەۋ تارتىبىنە اۋىستىرۋعا مىندەتتەدى. ونىڭ شىعارعان جارلىعى بويىنشا، بۇگىننەن باستاپ كاسىپورىندار اپتا سايىن قاشىقتان جۇمىس ىستەيتىن قىزمەتكەرلەرى جونىندە مالىمەت تاپسىرۋى ءتيىس.
يران بيلىك وكىلدەرى سوڭعى ءبىر تاۋلىكتە كوروناۆيرۋس دەرتىنەن 250 ادام قايتىس بولعانىن حابارلادى. بۇل ىندەت باستالعالى ەڭ جوعارى كورسەتكىش. جالپى ەلدە بۇل اۋرۋدان 28 مىڭنان اسا ادام كوز جۇمعان. قازىرگى كەزدە 4 جارىم مىڭداي ناۋقاس اۋىر حالدە. اۋرۋحانالاردا بوس ورىن قالعان جوق. ۇكىمەت وكىلدەرى ەپيدەميولوگيالىق احۋالدىڭ ۋشىعۋىنا تۇرعىنداردىڭ قاۋىپسىزدىك شارالارىن ساقتاماۋى سەبەپ بولعان دەپ سانايدى.
«ادىرنا» ۇلتتىق پورتالى
