Álem boıynsha koronavırýs pandemııasy dendep barady, dep habarlaıdy «Adyrna» ulttyq portaly «Habar 24»-ke silteme jasap.
Bul dertke shaldyqqandardyń sany 37 mıllıonnan asyp ketti. Bir mıllıonnan astam naýqastyń qaıtys bolǵany habarlandy. Eýropa qurlyǵynda da indet órship tur. Munda ekinshi tolqynnyń aýqymy kóktemgi jaǵdaıdan da asyp ketýi múmkin degen boljam bar. Mysaly, Franııada kún saıyn 16 myńnan asa naýqas tirkelip keledi. Qaýiptiń eń joǵary deńgeıi jarııalanǵan aımaqtar tizimine taǵy da tórt qala – Lıon, Lıll, Grenobl jáne Sent-Eten qosyldy. Osyǵan deıin bul deńgeı Parıj, Marsel qalalary men Gvadelýpa aralynda jarııalanǵan bolatyn. Al Ulybrıtanııada sońǵy bir táýlikte 13 myńdaı naýqas anyqtaldy. Al keselge dýshar bolǵan jandardyń sany 600 myńnan asty. Búgin premer-mınıstr Borıs Djonson jańa karantın sharalaryn jarııalaýy múmkin. Atap aıtqanda, meıramhanalar men pabtar ýaqytsha jabylatyn sekildi.
«Aýrýdy juqtyrý deregi tirkelgende jergilikti deńgeıde sharalar qabyldap jatqanymyz durys dep sanaımyn. Eshkim jalpyulttyq shekteýlerdiń qabyldanýyn qalamaıdy. Muny boldyrmaýdyń jolyn izdep jatyrmyz»,-deıdi Ulybrıtanııa turǵyn úı-kommýnaldyq sharýashylyǵynyń mınıstri
Robert Djenrık.
Reseı naýqastar sany boıynsha álemde tórtinshi orynda tur. Kún saıyn juqtyrý derekteri artyp bara jatqandyqtan, Máskeý meri jergilikti kompanııalardy qyzmetkerleriniń 30% jáne jasy 65-ten asqandar men sozylmaly aýrýlary bar adamdardy qashyqtan jumys isteý tártibine aýystyrýǵa mindettedi. Onyń shyǵarǵan jarlyǵy boıynsha, búginnen bastap kásiporyndar apta saıyn qashyqtan jumys isteıtin qyzmetkerleri jóninde málimet tapsyrýy tıis.
Iran bılik ókilderi sońǵy bir táýlikte koronavırýs dertinen 250 adam qaıtys bolǵanyn habarlady. Bul indet bastalǵaly eń joǵary kórsetkish. Jalpy elde bul aýrýdan 28 myńnan asa adam kóz jumǵan. Qazirgi kezde 4 jarym myńdaı naýqas aýyr hálde. Aýrýhanalarda bos oryn qalǵan joq. Úkimet ókilderi epıdemıologııalyq ahýaldyń ýshyǵýyna turǵyndardyń qaýipsizdik sharalaryn saqtamaýy sebep bolǵan dep sanaıdy.
«Adyrna» ulttyq portaly
