2016 جىلدان بەرگى ورتا ءبىلىم بەرۋدى مودەرنيزايالاۋعا جۇمسالعان شىعىنداردى قارجى مينيسترلىگى تەكسەرۋدى قولعا الادى. بۇل تۋرالى پرەمەر مينيستر اسقار ءمامين مالىمدەدى دەپ حابارلايدى «ادىرنا» ۇلتتىق پورتالى Pravo.kz-كە سىلتەمە جاساپ.
قازاقستان قارجى مينيسترلىگىنىڭ اۋديتورلارى سوڭعى ءتورت جىلدا ورتا ءبىلىم بەرۋ جۇيەسىن جاڭارتۋ، جەتىلدىرۋ بويىنشا ەل قازىناسىنان بولىنگەن ميللياردتتاردىڭ قالاي جۇمسالعانىن جانە قانداي ناتيجەسى بارىن تەكسەرەدى. بۇل تەكسەرۋ جۇمىستارى 9 قىركۇيەكتە ءماجىلىس دەپۋتاتى ءجاميلا نۇرمانبەتوۆانىڭ ساۋالىنان كەيىن قولعا الىنعان سياقتى. ەستەرىڭىزدە بولسا، سول كۇنى دەپۋتات نۇمانبەتوۆا e-learning ەلەكتروندى وقىتۋ جۇيەسى ءۇشىن ءبىلىم جانە عىلىم مينيسترلىگىنە بيۋدجەتتەن 30 ملرد تەڭگە بولىنگەنىن ايتقان ەدى. وكىنىشكە قاراي، 30 ملرد تەڭگە بولىنگەن بۇل ەلەكتروندى وقىتۋ جۇيەسى اتى بار، زاتى جوق دۇنيەگە اينالعانىن قازىرگى كەزدە كوزىمىز جەتتى. پاندەميا كەزىندە قاشىقتان وقىتۋ ماسەلەسى الدىمىزدان كولدەنەڭ شىققاندا، كەزىندە ميللياردتاپ اقشا بولىنگەن e-learning جۇيەسىنىڭ ءىزىن دە تاپپادىق.
ءبىلىم جانە عىلىم مينيسترلىگىنە قاتىستى دەپۋتات دانيا ەسپانوۆا دا قاتتى سىن ايتىپ، قازىرگى مينيستر اسحات ايماعامبەتوۆتى جاۋاپقا تارتۋدى دا سۇراعان ەدى. سونىمەن قاتار ەسەپ كوميتەتى 19 قىركۇيەكتە قازاقستان ءبىلىم سالاسىنا دۇنيەجۇزىلىك بانكتەن الىنعان 67 ملن دوللار زاەم قاراجاتىنىڭ قالاي جۇمسالعانىن تەكسەرۋدى قولعا الاتىنىن مالىمدەدى.
«ايراندى ىشكەندەر قۇتىلىپ، شەلەك جالاعاندار تۇتىلماسا» يگى ەدى. سەبەبى، 2016 جىلدان بەرى ءبىلىم جانە عىلىم مينيسترلىگىن جالعىز اسحات ايماعامبەتوۆ باسقارماعانىن ەسكەرسەك، وندا، وسىعان دەيىن بۇل مينيسترلىكتى باسقارعان اسلان ءسارىنجىپوۆ، ەرلان ساعاديەۆ، كۇلاش شامشيدينوۆا دا جاۋاپقا تارتىلىپ، ميللياردتاعان قارجىنىڭ قايدا جانە قالاي جۇمسالعانىنا ەسەپ بەرەدى دەپ ۇمىتتەنەمىز.
فوتو اشىق دەرەككوزدەن الىندى.
