Bilim salasy: «Aıran ishken qutylyp, shelegin jalaǵan tutylmasyn»

3650
Adyrna.kz Telegram

2016 jyldan bergi orta bilim berýdi modernızaııalaýǵa jumsalǵan shyǵyndardy Qarjy mınıstrligi tekserýdi qolǵa alady. Bul týraly premer mınıstr Asqar Mámın málimdedi dep habarlaıdy «Adyrna» ulttyq portaly Pravo.kz-ke silteme jasap.

Qazaqstan Qarjy mınıstrliginiń aýdıtorlary sońǵy tórt jylda orta bilim berý júıesin jańartý, jetildirý boıynsha el qazynasynan bólingen mıllıardttardyń qalaı jumsalǵanyn jáne qandaı nátıjesi baryn tekseredi. Bul tekserý jumystary 9  qyrkúıekte májilis depýtaty Jámılá Nurmanbetovanyń saýalynan keıin qolǵa alynǵan sııaqty. Esterińizde bolsa, sol kúni depýtat Numanbetova e-learning  elektrondy oqytý júıesi úshin Bilim jáne ǵylym mınıstrligine bıýdjetten 30 mlrd teńge bólingenin aıtqan edi. Ókinishke qaraı,  30 mlrd  teńge bólingen bul elektrondy oqytý júıesi aty bar, zaty joq dúnıege aınalǵanyn qazirgi kezde kózimiz jetti. Pandemııa kezinde qashyqtan oqytý máselesi aldymyzdan kóldeneń shyqqanda, kezinde mıllıardtap aqsha bólingen e-learning  júıesiniń izin de tappadyq.

Bilim jáne ǵylym mınıstrligine qatysty depýtat Danııa Espanova da qatty syn aıtyp, qazirgi mınıstr Ashat Aımaǵambetovti jaýapqa tartýdy da suraǵan edi. Sonymen qatar Esep komıteti  19 qyrkúıekte Qazaqstan bilim salasyna Dúnıejúzilik bankten alynǵan 67 mln dollar zaem qarajatynyń qalaı jumsalǵanyn tekserýdi qolǵa alatynyn málimdedi.

«Aırandy ishkender qutylyp, shelek jalaǵandar tutylmasa» ıgi edi. Sebebi, 2016 jyldan beri Bilim jáne ǵylym mınıstrligin jalǵyz Ashat Aımaǵambetov basqarmaǵanyn eskersek, onda, osyǵan deıin bul mınıstrlikti basqarǵan Aslan Sárinjipov, Erlan Saǵadıev, Kúlásh Shamshıdınova da jaýapqa tartylyp, mıllıardtaǵan qarjynyń qaıda jáne qalaı jumsalǵanyna esep beredi dep úmittenemiz.

Foto ashyq derekkózden alyndy.

Pikirler