قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جارلىعىنا سايكەس كوكشەتاۋ قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ومار بەكين «حالىق العىسى» مەدالىمەن ماراپاتتالدى. ول ماراپاتىن وبلىس اكىمى ەرمەك مىرجىقپاەۆتىڭ قولىنان الدى.
جەر مەن ەلدى كورونوۆيرۋس جاۋلاپ، كارانتين جاريالانعان ساتتە ەلباسىنىڭ باستاماسىمەن «ءبىز بىرگەمىز» اكتسياسى باستاۋ العان بولاتىن. اتالمىش اكتسيا اياسىندا كوكشەتاۋلىق ەرىكتىلەر الەۋمەتتىك از قامتىلعان وتباسىلارعا ازىق-تۇلىك تاسۋدى قولعا الدى. ۇيدەگى اتا-انالارىنىڭ ۇرەيلەرىنە قاراماي، ءوزىن ەمەس وزگەنى ويلاعان ومار قاتارلاستارىنان قالماي اكتسياعا بەلسەندى اتسالىستى. جەكە ءوزى 500-دەن استام ۇيگە ازىق-تۇلىك تاسىعان.
«مەنى ناگرادا الاتىن ادامداردىڭ تىزىمىنە ەنگىزىپ جاتقانىن بىلگەندە قاتتى تاڭعالدىم، ەكىنشىدەن ىڭعايسىزداندىم. ويتكەنى، جۇمىس ىستەپ جۇرگەن ەرىكتىلەر قاتارى وتە كوپ. ولارلىڭ تەك تورتەۋى عانا ماراپاتقا يە بولدى. سونىڭ ءبىرى مەن بوللدىم. ودان قالدى، وسى مەدالعا يە بولعان قازاقستاندىقتاردىڭ ىشىندە ەڭ جاسىمەن ەكەنمىن. قالعاندارى كۇن-ءتۇنى قىزمەتتە ءجۇرىپ، وزدەرىنىڭ دەنساۋلىقتارىن، جانۇيالارىن ەمەس، ەلدىڭ قامىن ويلاپ جۇرگەن دارىگەرلەر، قۇقىققورعاۋ ورگاندارىنىڭ قىزمەتكەرلەرى. ارينە، ونداي ادامدارمەن ءبىر دەڭگەيدە بولۋ، بىردەي ماراپات الۋ مەن ءۇشىن زور ماقتانىش»، – دەيدى ومار.
ومار نەبارى 17 جاستا. دەگەنمەن، ەرىكتىلەر قوزعالىسىنداعى، «نۇر وتان» پارتياسىنداعى تاجىريبەسى بارشىلىق. ساباقتا ۇزدىك بولماسا دا، جاقسى وقيتىنداردىڭ قاتارىندا. بولاشاق ماماندىعىن ساياساتپەن نە بولماسا ينفورماتيكامەن بايلانىستىرعىسى كەلەدى. جوو ءالى تاڭداماپتى. «قايدا وقىسام دا، ديپلومىمدى العان سوڭ قازاقستاندا جۇمىس ىستەپ، ەلىمنىڭ كوركەيۋىنە ۇلەسىمدى قوساتىن بولامىن»، – دەيدى.
وماردىڭ ومىرلىك ۇستانىمى – «مەن بولماسام، كىم؟». بۇل سوزدەر ونى العا يتەرمەلەيتىن كورىنەدى. وقۋشىنىڭ بوس ۋاقىتى جوق دەۋگە دە بولادى. مەكتەپتەگى وقۋىنان بولەك، «نۇر وتانداعى» جۇمىسى بار. قازىرگى تاڭدا، ول «Nur Otan» پارتياسى جانىنداعى «Jas Otan» جاستار قاناتىنىڭ كوكشەتاۋ قالالىق بولىمشەسىنىڭ جەتەكشىسى. كوپ ۋاقىتىن بەلسەندىلەر مەن ەرىكتىلەردىڭ قىزمەتىن ۇيىمداستىرۋعا جىبەرەدى ەكەن. سونىمەن قاتار، «دۋمان» اقمولا وبلىستىق پەداگوگيكالىق جاساعىنىڭ جەتەكشىسى، «قازاقستاندىق جاس پاتريوتتار اكادەمياسىنىڭ» مۇشەسى.
17 جاسار وماردىڭ قورجىنىندا ءتۇرلى دەڭگەيدەگى ماراپاتتار از ەمەس. ايتالىق، قر تۇڭعىش پرەزيدەنتى نۇرسۇلتان ءابىشۇلى نازارباەۆتىڭ، «Jas Otan» جاستار قاناتىنىڭ اقمولا وبلىستىق فيليالى توراعاسىنىڭ، «Nur Otan» پارتياسى جەتەكشىسىنىڭ ءبىرىنشى ورىنباسارىنىڭ العىس حاتتارى بار.
«ەرىكتى بولۋ ماعان ىشكى قاناعاتتانۋ سەزىمىن سىيلايدى. مەنىڭشە، كومەككە ءزارۋ جانعا قول ۇشىن سوزۋ مۇمكىندىگىڭ بار بولسا، نەگە سول مۇمكىندىكتى پايدالانباسقا. بۇل – كەز كەلگەن قازاقستاندىقتىڭ ازاماتتىق پارىزى دەپ ويلايمىن. ەرىكتى بولعاندا اقشا تابۋدى ەشقاشان كوزدەگەن ەمەسپىن، ەشقانداي پايدا كورمەيمىن دە. ماعان «جاس وتانداعى» اتموسفەرا ۇنايدى. ويتكەنى، باسقا ادامدارعا كومەكتەسەتىن جاندار ەشقاشان جامان بولۋى مۇمكىن ەمەس. جانە كوز-قاراستارى ورتاق ادامدارمەن جۇمىس ىستەۋ وتە كەرەمەت. وسىنىڭ بارلىعى ماعان موتيۆاتسيا بەرەدى»، – دەيدى ومار.
نزم ءباسپاسوز قىزمەتى
