Prezıdent marapaty óz qaharmanyn tapty

466

Qazaqstan Respýblıkasynyń Prezıdenti Qasym-Jomart Toqaevtyń Jarlyǵyna sáıkes Kókshetaý qalasyndaǵy Nazarbaev Zııatkerlik mektebiniń 12-synyp oqýshysy Omar Bekın «Halyq alǵysy» medalimen marapattaldy. Ol marapatyn oblys ákimi Ermek Myrjyqpaevtyń qolynan aldy.

Jer men eldi koronovırýs jaýlap, karantın jarııalanǵan sátte Elbasynyń bastamasymen «Biz birgemiz» akııasy bastaý alǵan bolatyn. Atalmysh akııa aıasynda kókshetaýlyq eriktiler áleýmettik az qamtylǵan otbasylarǵa azyq-túlik tasýdy qolǵa aldy. Úıdegi ata-analarynyń úreılerine qaramaı, ózin emes ózgeni oılaǵan Omar qatarlastarynan qalmaı akııaǵa belsendi atsalysty. Jeke ózi 500-den astam úıge azyq-túlik tasyǵan.

«Meni nagrada alatyn adamdardyń tizimine engizip jatqanyn bilgende qatty tańǵaldym, ekinshiden yńǵaısyzdandym. Óıtkeni, jumys istep júrgen eriktiler qatary óte kóp. Olarlyń tek tórteýi ǵana marapatqa ıe boldy. Sonyń biri men bolldym. Odan qaldy, osy medalǵa ıe bolǵan qazaqstandyqtardyń ishinde eń jasymen  ekenmin. Qalǵandary kún-túni qyzmette júrip, ózderiniń densaýlyqtaryn, januıalaryn emes, eldiń qamyn oılap júrgen dárigerler, quqyqqorǵaý organdarynyń qyzmetkerleri. Árıne, ondaı adamdarmen bir deńgeıde bolý, birdeı marapat alý men úshin zor maqtanysh», – deıdi Omar.

Omar nebári 17 jasta. Degenmen, eriktiler qozǵalysyndaǵy, «Nur Otan» partııasyndaǵy tájirıbesi barshylyq. Sabaqta úzdik bolmasa da, jaqsy oqıtyndardyń qatarynda. Bolashaq mamandyǵyn saıasatpen ne bolmasa ınformatıkamen baılanystyrǵysy keledi. JOO áli tańdamapty. «Qaıda oqysam da, dıplomymdy alǵan soń Qazaqstanda jumys istep, elimniń kórkeıýine úlesimdi qosatyn bolamyn», – deıdi.

Omardyń ómirlik ustanymy – «Men bolmasam, kim?». Bul sózder ony alǵa ıtermeleıtin kórinedi. Oqýshynyń bos ýaqyty joq deýge de bolady. Mekteptegi oqýynan bólek, «Nur Otandaǵy» jumysy bar. Qazirgi tańda, ol «Nur Otan» partııasy janyndaǵy «Jas Otan» Jastar Qanatynyń Kókshetaý qalalyq bólimshesiniń jetekshisi. Kóp ýaqytyn belsendiler men eriktilerdiń qyzmetin uıymdastyrýǵa jiberedi eken. Sonymen qatar, «Dýman» Aqmola oblystyq pedagogıkalyq jasaǵynyń jetekshisi, «Qazaqstandyq jas patrıottar akademııasynyń» múshesi.

17 jasar Omardyń qorjynynda túrli deńgeıdegi marapattar az emes. Aıtalyq, QR Tuńǵysh Prezıdenti Nursultan Ábishuly Nazarbaevtyń,  «Jas Otan» Jastar Qanatynyń Aqmola oblystyq fılıaly Tóraǵasynyń, «Nur Otan» partııasy jetekshisiniń birinshi orynbasarynyń Alǵys hattary bar.

«Erikti bolý maǵan ishki qanaǵattaný sezimin syılaıdy. Menińshe, kómekke zárý janǵa qol ushyn sozý múmkindigiń bar bolsa, nege sol múmkindikti paıdalanbasqa. Bul – kez kelgen qazaqstandyqtyń azamattyq paryzy dep oılaımyn. Erikti bolǵanda aqsha tabýdy eshqashan kózdegen emespin, eshqandaı paıda kórmeımin de. Maǵan «Jas Otandaǵy» atmosfera unaıdy. Óıtkeni, basqa adamdarǵa kómektesetin jandar eshqashan jaman bolýy múmkin emes. Jáne kóz-qarastary ortaq adamdarmen jumys isteý óte keremet. Osynyń barlyǵy maǵan motıvaııa beredi», – deıdi Omar.

NZM baspasóz qyzmeti

 

 

Pikirler
Redakııa tańdaýy
Basqa materıaldar