شىمكەنت قالاسىندا شالعاي ورنالاسقان تۇرعىن الاپتارداعى 39 كوشەگە جارىق شامدار ورناتىلىپ، ءتورت كوشەنىڭ جارىق جۇيەلەرىنە قايتا قۇرۋ جۇمىستارى جۇرگىزىلدى. ال الداعى ءۇش جىلدا قالاداعى 303 كوشەنى جارىقتاندىرۋ جوسپارلانىپ وتىر. بۇل تۋرالى ەنەرگەتيكا جانە كوممۋنالدىق شارۋاشىلىق باسقارماسى حابارلادى.
باسقارما ماماندارىنىڭ مالىمەتىنە سۇيەنسەك، قالاداعى قۇرساي، قازعۇرت، ساۋلە شاعىن اۋداندارىنداعى بىرقاتار كوشەلەر مەن قايناربۇلاق ساياجايىنىڭ ورتالىق كوشەسىنە جارىقتاندىرۋ باعانالارى قويىلۋدا ەكەن.
سونداي-اق، لەنگىر باعىتىنداعى تاس جولدىڭ ەسكى شامدارى ديودتى شامدارعا اۋىستىرىلىپ، قوسىمشا جارىق جۇيەسى ورناتىلعان.
سالا ماماندارىنىڭ ايتۋىنشا، قالا كوشەلەرىن جارىقتاندىرۋ بويىنشا ءۇش جىلدىق جوسپار جاسالىنعان. جوسپار تولىق ىسكە اسىرىلعان ۋاقىتتا 100 پايىز ەنەرگيا ۇنەمدەيتىن LED شامدار قويىلىپ، توزعان تىرەكتەردى تولىعىمەن جاڭاسىنا اۋىستىرىپ، جارىقتاندىرىلاتىن كوشەلەردىڭ سانى 181-دەن 484 كوشەگە ۇلعايادى ەكەن.
سونىمەن قاتار، شالعاي ەلدى مەكەندەردەگى كوشەلەردى سىرتقى جارىقتاندىرۋمەن قامتاماسىز ەتۋ جانە ديسپەتچەرلىك ورتالىق قۇرۋ ارقىلى ءبىر ورتالىقتان باسقارۋ كوزدەلىپ وتىر.
شىمكەنت قالاسى اكىمىنىڭ ءباسپاسوز قىزمەتى
