شىمكەنتتە 3500-گە جۋىق كەزەكشى سىنىپ اشىلدى

1751
Adyrna.kz Telegram

پاندەمياعا بايلانىستى ەلىمىزدە وقۋ جۇيەسى قاشىقتان وقىتۋ فورماتىندا ءجۇرىپ جاتىر.

بۇگىندە ءۇشىنشى مەگاپوليس سانالاتىن شىمكەنت قالاسىندا جەڭىلدەتىلگەن كارانتين رەجيمىنە سايكەس 1-4 سىنىپ وقۋشىلارى مەكتەپ قابىرعاسىندا ءبىلىم الىپ جاتىر.

49 640 باستاۋىش سىنىپ وقۋشىسى ءۇشىن اتا-انالاردىڭ ءوتىنىشى نەگىزىندە 3 344 كەزەكشى توپ اشىلدى. ياعني ءبىلىم الۋشىلاردىڭ 22 پروتسەنتى مەكتەپكە بارىپ جاتسا، قالعان 78 پروتسەنتى قاشىقتان ءبىلىم الۋدا.

بارلىق مەكتەپتەردە «Bilim Iand - Onlinemektep.org» ينتەرنەت پلاتفورماسىندا قاشىقتان وقىتۋ ۇيىمداستىرىلعان. سونىمەن قاتار، بارلىق مەكتەپتەر قر بعم تاراپىنان ەندىرىلگەن «كۇندەلىك.كز» ەلەكتروندى جۋرنالدار اقپاراتتىق جۇيەسىندە جۇمىس جۇرگىزىپ جاتىر.

بالالار مەكتەپكە كىرمەس بۇرىن كۇندەلىكتى دەزينفەكتسيالىق وتكەلدەن ءوتۋى ءتيىس. ارىقاراي ولاردىڭ قىزۋى ولشەنىپ، انتيسەپتيك قۇرالىمەن قولدارىن زالالسىزداندىرادى. سونداي-اق، وزىمەن بىرگە مەديتسينالىق بەتپەردەسى جوق وقۋشىعا جاڭا ماسكا بەرىلەدى.

ءار كابينەتتەگى بالا سانى 15-تەن اسپايدى. ءوزارا 1,5 مەتر اراقاشىقتىقتا قويىلعان ءار پارتادا تەك ءبىر عانا وقۋشى وتىرادى. كەزەكشى سىنىپتارداعى ساباقتار ءار ۋاقىتقا قويىلعان. ءۇزىلىس تە ءارتۇرلى ۋاقىتتا بولىپ جاتىر.

شىمكەنت قالاسى اكىمىنىڭ ءباسپاسوز قىزمەتى

پىكىرلەر