جەراستى اۆتوتۇراقتارى، جەكە پاۆيلوندار مەن حامام مونشاسى – جاڭارعان «QYRGY BAZAR» اۋماعىندا وسىنىڭ بارلىعى بولادى.
كوتەرمە جانە بولشەك ساۋدا ورتالىعى رەتىندە قىزمەت كورسەتەتىن «قىرعى بازاردا» بۇگىندە قۇرىلىس جۇمىستارى قارقىندى تۇردە ءجۇرىپ جاتىر.
شىمكەنت قالاسىنىڭ ەنەرگەتيكا جانە كوممۋنالدىق شارۋاشىلىق باسقارماسىنىڭ تاپسىرىسىمەن بازار الدىنا گۇلزار سالىنعان. بۇل تۇرعىندارعا قولايلى جاعداي تۋعىزىپ وتىر.
جاڭعىرتۋ جوباسىنا سايكەس، بازار اۋماعى 30 مىڭ شارشى مەتردەن 85 مىڭ شارشى مەترگە دەيىن ۇلعايتىلماق. وعان 5 ملرد. تەڭگە ينۆەستيتسيا سالىنادى.
جوبا بويىنشا بازاردا ءۇش قاباتتى جانە بەس قاباتتى ساۋدا پاۆيلوندارى بولادى. ولاردىڭ اربىرىندە جەراستى اۆتوتۇراعى قاراستىرىلعان.
ينۆەستورلاردىڭ ايتۋىنشا، تاۋاردىڭ ءاربىر تۇرىنە جەكە ايماق بولىنەدى. كەپتىرىلگەن جەمىستەر، كونديتەرلىك ونىمدەر، كوكونىس، ءسۇت جانە نان ونىمدەرى بار سورەلەر ورتالىق الاڭنىڭ اينالاسىندا ورنالاسادى. ال، جەكە پاۆيلوندارعا تۇرمىستىق تەحنيكا، قۇرىلىس ماتەريالدارى جانە ۇيگە قاجەتتى باسقا دا تاۋارلار قويىلادى.
سونداي-اق، جۇك ساقتاۋ كامەرالارى، قويمالار، حامام مونشاسى، بالالار الاڭى، 600 ورىندىق اۆتوتۇراق، ءتىپتى قوناق ءۇي ءۇشىن دە ورىن قاراستىرىلعان.
كەلەر جىلى جاڭا بازاردىڭ 40 پروتسەنتى پايدالانۋعا بەرىلسە، 2023 جىلى جۇمىس تولىعىمەن اياقتالادى دەپ كۇتىلۋدە.
شىمكەنت قالاسى اكىمىنىڭ ءباسپاسوز قىزمەتى
