اقتاۋداعى 22 شاعىناۋداندا ورنالاسقان "ماسات" بازارىندا ءورت شىققان. ءورتتى سوندىرۋگە جۇزدەن استام ادام تارتىلدى، - دەپ حابارلايدى "ادىرنا" ۇلتتىق پورتالى ماڭعىستاۋ وبلىسىنىڭ توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساپ.
ءورت تۋرالى حابارلاما ساعات 6.55-تە تۇسكەن. 17 ساۋدا دۇڭگىرشەگى مەن 14 كونتەينەر، شاتىر استىنداعى 60-قا جۋىق سورە جانىپ كەتكەن.
وبلىستىق تجد باسشىسىنىڭ ورىنباسارى بەكبولات ابدىقادىروۆ: "قىزىل جالىن 8.16-دا ءسوندىرىلدى. قازا بولعاندار مەن زارداپ شەككەندەر جوق. ءتىلسىز جاۋمەن كۇرەسكە تجد-ءنىڭ 65 قىزمەتكەرى جانە 11 تەحنيكا، مەملەكەتتىك ەمەس ءورت ءسوندىرۋ قىزمەتتەرىنىڭ 10 قىزمەتكەرى جانە 2 تەحنيكا، مەديتسينا جانە اپاتتار ورتالىعىنان 3 قىزمەتكەر جانە 1 تەحنيكا، 54 پوليتسيا قىزمەتكەرى جانە 25 تەحنيكا جۇمىلدىرىلدى. ءورتتىڭ شىعۋ سەبەپتەرى انىقتالىپ جاتىر", - دەپ مالىمدەمە جاسادى.
فوتو اشىق دەرەككوزدەن الىندى
"ادىرنا" ۇلتتىق پورتالى
