پاندەميا كەزىندە ەلىمىزدەگى ءتۇرلى كاسىپ يەلەرى قارجىلاي داعدارىسقا تاپ بولدى. شىعىن كولەمى كۇن ساناپ ارتۋدا. سولاردىڭ قاتارىندا شاشتارازدار مەن سۇلۋلىق سالوندارى بار.
كارانتيننىڭ سالدارىنان كاسىپكەرلىكتىڭ ءتۇر-ءتۇرى زارداپ شەگىپ، كوبىسى امالسىز قىزمەتىن توقتاتۋعا ءماجبۇر بولۋدا. ەلىمىزدەگى ءسان سالوندارى مەن شاشتارازدار 21 ناۋرىزدا جابىلىپ، 18 مامىردا عانا اشىلعانى ءمالىم. وسى ۋاقىت ارالىعىندا تابىسسىز قالعان وسى كاسىپتىڭ يەلەرى مامىردىڭ ورتاسىندا جۇمىسىنا كىرىسكەنى سول ەدى، كوپ ۇزاماي، 5 شىلدەدە قايتا جابىلدى. سانيتارلىق تالاپتاردىڭ قاتاڭ بولعانى سونداي، كوپ شاشتاراز بۇل تالاپقا ساي كەلمەي، ءتىپتى مۇلدە جابىلىپ تا تىندى.
17 تامىزدا جۇمىسىنا قايتا كىرىسكەنىمەن، ەلىمىزدەگى شاشتاراز، ءسان سالوندارى سەنبى، جەكسەنبى كۇندەرى ەسىكتەرىنە قارا قۇلىپ سالۋعا ءماجبۇر. تالاپ سونداي. سوعان قاراماستان، ولمەستىڭ كۇنىن كەشىپ، ۇكىمەتكە الاقان جايماۋ ماقساتىندا قولدا بار كاسىبىن دوڭگەلەتۋگە بار كۇشىن سالىپ جاتقان كاسىپكەرلەر جوق ەمەس. شىمكەنتتىك بىرقاتار ءسان سالونى مەن شاشتاراز ورىندارىن ارالاپ شىعىپ، تومەندەگىدەي جايتقا كوز جەتكىزدىك.
ءوزىنىڭ جەكە سۇلۋلىق سالونىن سوڭعى ون جىلدا اياعىنا تىك تۇرعىزىپ، پايداسىن كورىپ كەلگەن اينۇر قۇرالبەكقىزى كارانتيندە كاسىبىنىڭ توقىراپ قالعانىن ايتادى. «ەشكىمگە وڭاي تيمەدى بۇل پاندەميا. دەسەك تە، سالونىمدا بۇعان دەيىن قىزمەت ەتكەن شەبەرلەرىمنىڭ ءبىرازىن جوعالتتىم. كۇنكورىس قامىمەن باسقا سالادان نانىن تابۋعا كەتتى. وسىعان دەيىنگى تۇراقتى كليەنتتەرىمنىڭ دە سانى ەكى ەسەگە كۇرت تومەندەدى. كارانتين كەزىندە كليەنتتىڭ شاقىرتۋىمەن ۇيىنە بارىپ مانيكيۋر، پەديكيۋر سىندى قىزمەتتەر كورسەتكەن شەبەرلەرىم بار. الايدا پايدا ءتۇسىمى وتە تومەن بولدى.
ەرتەڭگى كۇنىمىز قالاي بولىپ كەتەر ەكەن دەپ الاڭداعان جۇرت تىرناعىن ارلەۋدى ويلامايتىنى زاڭدىلىق تا شىعار. قازىر اپتانىڭ بەس كۇنىندە كەشكى ساعات التىعا دەيىن جۇمىس ىستەپ جاتىرمىز. وكىنىشكە قاراي، كەلۋشىلەر وتە از. كوبىسى سۇلۋلىق ماسەلەسىمەن دەمالىس كۇندەرى اينالىسقىسى كەلەدى. الايدا دەمالىس كۇندەرى بىزگە جۇمىس ىستەۋگە تىيىم سالىنعان. سونىمەن قاتار سالونىمىز تويدىڭ كەزىندە جاندانىپ جۇمىس ىستەيتىن. ال قازىر توي دا جوق. سوندىقتان بولسا كەرەك، كىرىستەن گورى، شىعىنىمىز باسىم تۇسۋدە. سالوننىڭ بولمەسىن، ۇستەلدەرىن جالعا الامىز، كەرەكتى جابدىقتاردى ساتىپ الامىز. ال ءبىزدىڭ قىزمەتكە جۇگىنەتىندەر سانى وتە تومەن بولعاندىقتان، بۇل شىعىنداردىڭ ورنىن تولتىرۋ وتە قيىنعا سوعۋدا»، - دەيدى اينۇر.
تىرناق جاساۋدىڭ شەبەرى اياۋلىم ءسابيتوۆا: «كارانتين كەزىندە تۇراقتى جۇمىسىمىزدان ايىرىلىپ قالدىق. الايدا «ءار نارسەنىڭ قايىرى بار» دەمەكشى، كليەنتتەردىڭ شاقىرتۋىمەن ۇيىنە بارىپ قىزمەت كورسەتۋدىڭ ارقاسىندا جاعدايىمىزدى ءبىرشاما تۇزەتىپ الدىق. ماسەلەن، مەن قازىر ەشبىر سالوندا جۇمىس ىستەمەيمىن. ارنايى تاپسىرىسپەن جۇمىس ىستەيمىن. بىراق راسىمەن بۇرىنعىداي سۇرانىس جوعارى ەمەس. بۇرىن اپتانىڭ بارلىق كۇنىندە شاقىرتۋ بولاتىن. ال قازىر ەكى كۇندە ءبىر شاقىرتۋ الامىن. بالكىم، بۇرىنعىداي توي، بانكەت جوعىنان بولار. بالكىم، كوبىسى قاشىقتان جۇمىس ىستەگەندىكتەن بولار. ايتەۋىر قىز كەلىنشەكتەر قازىر «ادەمى بولۋعا» اسا قۇلشىنا قويمايتىن بولدى»، -دەپ كۇلدى.
وسىعان دەيىن ءبىر ايدا بىرنەشە رەت ءسان سالونىنا بارۋدى ادەتكە اينالدىرعان قىز كەلىنشەكتەرىمىز راسىمەن «ادەمى بولۋدان باس تارتتى ما» ، الدە باسقالاي سەبەپتەرى بار ما ەكەن؟
«كارانتينگە دەيىن ءبىرىنشى اپتادا شاشىمدى، ەكىنشى اپتادا كىرپىگىمدى جاساتۋعا باراتىنمىن. ايدىڭ ءۇشىنشى اپتاسى تىرناقتارىما ارنالسا، سوڭعى اپتادا ماسساج بەن باسقا دا بەت كۇتىمدەرى ءۇشىن ءسان سالونىنا باراتىنمىن. بيىلعى ناۋرىزدان كەيىن ءومىرىمىز كۇرت وزگەردى عوي. ءبىر جاققا شىعۋدىڭ ءوزى مۇڭعا اينالدى. العاشقى كەزدە ارينە، جاساتقان تىرناقتارىم كەتىلىپ، قولدارىم ۇسقىنسىز بولىپ، قاتتى كوڭىل كۇيىم تۇسكەن ەدى. مامىر ايىندا ءوسىپ كەتكەن شاشتارىم مەن ءتۇسىپ قالعان كىرپىكتەرىمە كوزىم ۇيرەنە باستادى.
كەيىنىرەك ۇيگە ءسان سالونىنان ادام شاقىرتىپ كەتىلگەن تىرناقتارىمدى دۇرىستاتىپ الاتىن بولدىم. وكىنىشكە قاراي، سونداي پروتسەدۋرانىڭ بىرىندە تىرناعىما ينفەكتسيا ءتۇسىپ، قاتتى زارداپ شەكتىم. سول جاعدايدان كەيىن ۇيگە ءسان سالونى قىزمەتكەرىن شاقىرتۋدى توقتاتتىم. قازىر قاشىقتان جۇمىس ىستەگەن سوڭ، سۇلۋلىققا اسا ءمان بەرمەيتىن بولىپ الدىق. ءسان سالونىنا ەكى ايدا ءبىر رەت بارامىن. وندا دا شاشىمدى قىسقارتىپ، كىرپىك جالعاتۋ ءۇشىن»،- دەيدى ءسان سالوندارىنىڭ تۇراقتى كليەنتتەرىنىڭ ءبىرى مايرا تۇرسىنباي.
قر سۇلۋلىق يندۋسترياسى اسسوتسياتسياسىنىڭ پرەزيدەنتى ماحمۋدجان تۋرسۋن ءسان سالوندارى نارىعىنىڭ 20 پايىزعا ازايعانىن ايتادى دەپ جازادى Caravan.kz سايتى. «بۇلاي ازايۋدىڭ سەبەبى، كارانتين شارالارى مەن سانيتارلىق تالاپتار ءۇشىن بولىنەتىن شىعىن كولەمىمەن بايلانىستى. ال ءسان سالونى قىزمەتىنە جۇگىنەتىندەر سانى 30 پايىزعا تومەندەگەن. ورتاشا كىرىس كولەمى 5-10 پايىزعا ازايدى. قازاقستاندىقتاردىڭ تابىسىنىڭ تومەندەۋى بۇعان باستى سەبەپ»، -دەگەن اسسوتسياتسيا پرەزيدەنتى قازىرگى قيىن كەزدە ناشار ماماندار كەتىپ، ناعىز كاسىبي ماماندار ىرىكتەلىپ جاتقانىن العا تارتادى.
ايەلدىڭ تابيعاتى ەڭ الدىمەن سۇلۋلىقپەن ۇندەسەتىنىن ەسكەرسەك، پاندەميا كەزىندەگى ءسان سالوندارىنىڭ جابىلۋى مەن قاشىقتان جۇمىس ىستەۋ ماسەلەلەرى وسى سۇلۋلىق پەن ايەل اراسىن الشاقتاتا تۇسكەندەي. ءسان سالوندارى تابىس كوزىنەن ايىرىلسا، ال ايەلدەر وسىعان دەيىنگى كورىكتىلىگىن كارانتين جاعدايىنا ايىرباستاعانداي كورىنەدى.
ءسىز قالاي ويلايسىز، قانداي جاعداي بولسا دا، ايەلدەر ادەمىلىگىن ساقتاعانى دۇرىس پا، الدە جاعدايعا بايلانىستى سالونداردى شەتكە ىسىرۋى كەرەك پە؟
راۋانا ديماشقىزى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
