اسحات ايماعامبەتوۆ: مەن كوپبالالى وتباسىندا دۇنيەگە كەلدىم

3189

بىرنەشە جىلدان بەرى ەلىمىزدە قىركۇيەك ايىنىڭ ءار ەكىنشى جەكسەنبىسى وتباسى كۇنى اتاپ وتىلۋدە. وسى مەرەكەگە وراي ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا ءوز وتباسى جايلى جازبا جاريالاپ، وتانداستارىمىزدى مەرەكەمەن قۇتتىقتادى.

اسحات ايماعامبەتوۆ: ادەتتە جەكە ءومىرىم تۋرالى ايتپايتىنمىن، بىراق بۇگىن جازۋدى ۇيعاردىم.

مەن كوپبالالى وتباسىندا دۇنيەگە كەلدىم: مەنەن بولەك وتباسىمىزدا تاعى بەس بالا بار. اكەم 6 جاسىمدا قايتىس بولدى، كەيىن انامىزعا بارلىق اۋىرتپاشىلىقتى ەڭسەرۋگە تۋرا كەلدى. سول كەزدە انام 40 جاسقا دا تولماعان ەدى، بىراق ماعان جاسى كەلگەن كىسى سياقتى كورىنەتىن. ونى ءوزىڭ سول جاستا بولعاندا عانا جاقسى تۇسىنەدى ەكەنسىڭ.

ودان كەيىن قيىن كەزەڭ،  90-جىلدار باستالدى. انامىزعا وتە قيىن بولعانىن بىلەمىن. اۋىلدا تۇردىق، انامىز جۇمىستان بولەك بىزبەن، شارۋاشىلىقپەن اينالىستى.

ءبىر-بىرىمىزگە كومەكتەستىك. سۋ تاسىدىق، شارۋاشىلىققا ارالاسىپ، مالعا ءشوپ دايىندادىق، پەش جاقتىق. ۇيدەگى ەرەسەكتەر ارتىنان ەرگەن باۋىرلارىنا ۇيرەتتى، ال كىشىلەر ۇلكەندەرگە كومەكتەستى. بۇل قيىن كەزەڭنىڭ ماعان ۇيرەتكەنى مول، اسىرەسە جاقىندارىمنىڭ، وتباسىمنىڭ قانشالىقتى قىمبات ەكەنىن ۇعىندىردى.

مەن – ەكى بالانىڭ اكەسىمىن. جۇمىستان كەيىن بالالارىڭ مەن جارىڭ ۇيدە قارسى العاندا بارلىق قيىندىقتى ۇمىتاسىڭ. اڭگىمەلەسىپ، بالالارمەن بىرگە ويناعاننان شارشاعانىڭ باسىلادى، راقاتتانىپ قالاسىڭ.

جىگەرلەندىرىپ، كۇش-قايرات بەرەتىن دە – وتباسىم.

جاقىندارىمىزدى باعالايىق.

“وتان وتباسىنان باستالادى” دەيدى دانا حالقىمىز. ءار وتباسىنىڭ دامۋى ارقىلى ەلىمىز دە گۇلدەنە بەرەدى.

مەرەكە قۇتتى بولسىن، دوستار!

بارلىعىڭىزعا زور دەنساۋلىق، وتباسىلارىڭىزعا بەرەكە تىلەيمىن!- دەپ قۇتتىقتادى.
ايتا كەتەيىك، 2013 جىلى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ «قازاقستان رەسپۋبليكاسىنداعى كاسىپتىك جانە وزگە دە مەرەكەلەر تۋرالى» زاڭعا وزگەرتۋلەر ەنگىزۋ جونىندەگى جارلىعىنا سايكەس، قىركۇيەك ايىنىڭ ەكىنشى جەكسەنبىسى - وتباسى كۇنى بولىپ بەكىتىلگەن بولاتىن.

فوتو اشىق دەرەككوزدەن الىندى

“ادىرنا” ۇلتتىق پورتالى

پىكىرلەر
رەداكتسيا تاڭداۋى