جەمقورلىق قىلمىسىن جاساپ، شەتەلگە قاشىپ كەتكەن قر اۋىل شارۋاشىلىعى مينيسترلىگى «كازۆودحوز» رمك-نىڭ اقمولا فيليالى ديرەكتورىنىڭ بۇرىنعى ورىنباسارى ءوز ەركىمەن ەلگە ورالماق. بۇل تۋرالى بۇگىن ونلاين رەجيمدە وتكەن بريفينگتە وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى مۇرات تولەۋباەۆ ايتتى, دەپ حابارلايدى قازاقپارات پورتالى.
ۆەدومستۆو باسشىسىنىڭ ايتۋىنشا، وبلىستىڭ جەمقورلىققا قارسى قىزمەتى ءارتۇرلى جازاعا تارتىلعان قر اشم «كازۆودحوز» رمك-نىڭ بىرقاتار لاۋازىمدى تۇلعاسىنا قاتىستى سوتقا دەيىنگى تەرگەۋدى اياقتادى.
وسى رەتتە, اتالمىش كاسىپورىننىڭ اقمولا وبلىستىق فيليالى ديرەكتورىنىڭ ورىنباسارى سوتقا دەيىنگى تەرگەۋ شارالارىنان قاشىپ، اقش اۋماعىنا جاسىرىنعان بولاتىن. وعان حالىقارالىق ىزدەۋ جاريالاندى.
«جەمقورلىققا قارسى قىزمەتتىڭ قىزمەتكەرلەرى ىزدەۋدە جۇرگەن ادامنىڭ تۋىستارىمەن جۇرگىزگەن ءتۇسىندىرۋ جۇمىستارىنىڭ ناتيجەسىندە كۇدىكتى بيىلعى 21 تامىزدا كەلتىرگەن شىعىندى، ياعني 46 187 614 تەڭگەنى تولىعىمەن وتەدى. سونىمەن بىرگە, ول قازاقستان رەسپۋبليكاسىنا قايتىپ كەلۋگە دايىن ەكەنىن جەتكىزدى»، – دەپ اتاپ ءوتتى مۇرات تولەۋباەۆ.
