كوروناۆيرۋسقا قارسى قازاقستاندىق ۆاكتسينا رەسەيلىك ۆاكتسيناعا قاراعاندا جاقسى ناتيجە كورسەتتى. بۇل تۋرالى اسحات ايماعامبەتوۆ ونلاين بريفينگتە مالىمدەدى دەپ حابارلايدى «ادىرنا» ۇلتتىق پورتالى liter.kz-كە سىلتەمە جاساپ.
«ەلىمىزدە 2020 جىلدىڭ 23 ناۋرىزىندا ۆيرۋسقا شالدىققان العاشقى ناۋقاستان پاتولوگيالىق ماتەريال الىنىپ، زەرتتەۋ جۇمىسى بىردەن باستالدى. 15 مامىردا ءبىزدىڭ عالىمدار ددۇ تىزىمىنە ەنگىزىلگەن كانديداتتىق ۆاكتسينانى دايىندادى. كلينيكاعا دەيىنگى سىناقتار ءساتتى ءوتتى. ءبىزدىڭ ۆاكتسينا انتيدەنەلەر جاعىنان شەتەلدىك انالوگتاردان كەم ەمەس», - دەدى مينيستر.
قازىر قازاقستان كلينيكالىق سىناقتاردىڭ ءبىرىنشى جانە ەكىنشى فازالارىنا كىرىسىپ، ەرىكتىلەردى ىزدەۋدە. الداعى ۋاقىتتا ەكى ۆاكتسينا سىنالاتىن بولادى. دەنساۋلىق ساقتاۋ مينيسترلىگىنىڭ مالىمدەمەسى بويىنشا، وتاندىق ۆاكتسينا رەسەيلىك ۆاكتسيناعا قاراعاندا الدەقايدا قاۋىپسىز.
«رەسەيدە جاسالعان «Sputnik V» ۆاكتسيناسىنىڭ بەلگىلى ءبىر قارسى كورسەتكىشتەرى بار. بۇل ۆاكتسينانى سوزىلمالى، جۇقپالى جانە رەسپيراتورلى اۋرۋلارمەن اۋىراتىن ادامدارعا سالۋعا بولمايدى. سونداي-اق، ونىڭ جۇكتى ايەلدەرگە، بالا ەمىزەتىن كەلىنشەكتەرگە، 18 جاسقا تولماعان جانە 60 جاستان اسقان ادامدارعا قارسى كورسەتكىشتەرى بار»,-دەپ حابارلادى دەنساۋلىق ساقتاۋ مينيسترلىگىنىڭ ءبىرىنشى ۆيتسە-ءمينيسترى مارات شورانوۆ.
ەستەرىڭىزگە سالا كەتەيىك، 2020 جىلدىڭ تامىز ايىنىڭ سوڭىندا پرەمەر-ءمينيستردىڭ ورىنباسارى رومان سكليار باستاعان قازاقستاندىق دەلەگاتسيا ماسكەۋگە بارىپ، رەسەي شىعارعان ۆاكتسينانى ساتىپ الۋ ماسەلەسىن تالقىلاعان ەدى. سونداي-اق، دەلەگاتسيا رەسەيدىڭ تىكەلەي ينۆەستيتسيا قورىمەن ء"وزارا تۇسىنىستىك" كەلىسىمىنە قول قويىپ قايتتى.
«ادىرنا» ۇلتتىق پورتالى
