رەسەيلىك جوعارى وقۋ ورىندارىندا ءبىلىم الىپ جۇرگەن قازاقستاندىق ستۋدەنتتەر كومەك سۇراپ ءتيىستى ورىندارعا حات جولدادى دەپ حابارلايدى «ادىرنا» ۇلتتىق پورتالى "كوممەرسانت" گازەتىنە سىلتەمە جاساپ.
رەسەي ۇكىمەتى ستۋدەنتتەردىڭ شتاتتى رەجيمدە وقۋىن جالعاستىراتىنىن مالىمدەگەن بولاتىن. وسىعان وراي شەتەلدىك ستۋدەنتتەر، ولاردىڭ قاتارىندا قازاقستاندىق ستۋدەنتتەر شەكارانىڭ اشىلماۋىنا بايلانىستى قاشىقتان ءبىلىم الۋعا ءماجبۇر بولماق. قاشىقتان ءبىلىم الۋدى قالاماعان ستۋدەنتتەر ماسەلەنى شەشىپ بەرۋدى سۇراپ رەسەي ۇكىمەتىنەن، فسبدان، رەسەي سىرتقى ىستەر مينيسترلىگىنەن، رەسەي ءبىلىم جانە عىلىم مينيسترلىگىنەن كومەك سۇراپ ارنايى حات جولداعان.
مىڭداعان قازاقستاندىق ستۋدەنتتىڭ قولى قويىلعان بۇل حاتتا: «رف ءبىلىم مينيسترلىگى ستۋدەنتتەرگە شتاتتى جاعدا ءبىلىم الۋعا رۇقسات بەردى. ال ءبىز، باسقا ەلدىڭ رەسەيدە وقيتىن ستۋدەنتتەرى شەكارانىڭ اشىلماۋىنا بايلانىستى مۇنداي مۇمكىندىكتەن شەت قالىپ وتىرمىز. سول سەبەپتى، بىزگە دە ءوز وقۋ ورىندارىمىزعا ورالۋعا جاعداي جاسالسا دەپ سۇرايمىز. ءبىرىمىزدىڭ جاتاقحانادا جەكە زاتتارىمىز قالسا، ەندى ءبىرىمىز جالدامالى پاتەرىمىزدەن ايىرىلعالى تۇرمىز.
ال بارىنەن بۇرىن، شىعارماشىلىق ماماندىق پەن مەديتسينا سالاسى بويىنشا ءبىلىم الىپ جاتقان ستۋدەنتتەرگە قاشىقتان ءبىلىم الۋ مۇمكىن ەمەس. ءبىز ءبىلىم دەڭگەيىمىزدىڭ باسەكەلەستەرىمىزدەن تومەن بولۋىن قالامايمىز» دەپ جازىلعان. بۇل پروبلەما تەك قازاقستاندىق قانا ەمەس، تۇركىمەنستاندىق ستۋدەنتتەرگە دە ورتاق. ويتكەنى رەسەي جوعارى وقۋ ورىندارىندا شامامەن 44 مىڭ قازاقستاندىق ستۋدەنت بار بولسا، تۇركىمەنستاندىق ستۋدەنتتەر سانى 30 مىڭنىڭ اينالاسى ەكەن.
ءبىلىم جانە عىلىم مينيسترلىگىنىڭ مالىمەتىنشە، 2019-2020 وقۋ جىلىندا رەسەيدە 297 993 شەتەلدىك ستۋدەنت وقىعان. ولاردىڭ كوپشىلىگى قازاقستان، تۇرىكمەنستان، وزبەكستان، قىتاي، تاجىكستان، ۋكراينا، ءۇندىستان، بەلارۋس، ءازىربايجان جانە قىرعىزستان ەلدەرىنىڭ ستۋدەنتتەرى.
