قازاقستاندىق عالىمدار ازىرلەگەن COVID-19-عا قارسى ۆاكتسينا جاقسى ناتيجە كورسەتتى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«وزدەرىڭىز بىلەتىندەي، قىسقا مەرزىمنىڭ ىشىندە عالىمدارىمىز COVID-19-عا قارسى 2 ۆاكتسينانى دايىندادى. دۇنيەجۇزىلىك دەنساۋلىق ساقتاۋ ۇيىمى ول ۆاكتسينالار بويىنشا شەشىم قابىلداپ، ءوز تىزىمىنە ەنگىزدى. ءبىزدىڭ يناكتيۆتەلگەن ۆاكتسينامىز قازىرگى ۋاقىتتا كلينيكاعا دەيىنگى كەزەڭنەن ءوتىپ، وتە جاقسى ناتيجەنى كورسەتتى. سۋببىرلىكتىك ۆاكتسينامىزعا كلينيكا الدىنداعى زەرتتەۋ جۇمىستارىن جۇرگىزۋدەمىز. مۇنان بولەك، ءۇش پلاتفورما بويىنشا ۆاكتسينا دايىنداۋ ۇستىندەمىز»، - دەدى مينيستر پەداگوگتار مەن ءبىلىم جانە عىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىندە. ونىڭ اتاپ وتۋىنشە، كلينيكاعا دەيىنگى سىناق ناتيجەسى اتالعان ۆاكتسينالاردىڭ قاۋىپسىز ەكەندىگىن كورسەتكەن. «الدىن الا ناتيجەلەرى وتە جاقسى. اتالعان ينستيتۋتتىڭ بازاسىندا بيو-فارماتسەۆتيكالىق زاۋىت سالىنىپ جاتىر. ول GMP ستاندارتى بويىنشا يممۋندىق-بولوگيالىق پرەپارتتار شىعاراتىن بولادى»، - دەدى اسحات ايماعامبەتوۆ.
