2021 جىلدىڭ جاڭا وقۋ جىلىندا 1-سىنىپ وقۋشىسى ساۋاتىن «الىپپەمەن» اشاتىن بولادى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ ايتتى, دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
«وزدەرىڭىز بىلەتىندەي، بيىل 1 قىركۇيەكتەن باستاپ 11-سىنىپتار جاڭا باعدارلامامەن وقۋعا كوشەتىن بولادى. مۇنان بولەك، مەملەكەتتىك ستاندارتقا وزگەرىس ەنگىزىلدى. ول وزگەرىستىڭ اياسىندا مەكتەپ باعدارلاماسىنا سايكەس، 1-سىنىپتارعا 1-2 توقسان «الىپپە»، 3-4 توقسان «انا ءتىلى» ەنگىزىلدى. بۇگىنگى كۇنى ءبىز وسى باعىت بويىنشا جۇمىس جۇرگىزىپ جاتىرمىز. قازىر وقۋلىقتاردى، باعدارلامانى دايىنداۋ ۇستىندەمىز. كەلەسى جىلى وسى وقۋلىقتار، باعدارلامالار ءبىزدىڭ بارلىق 7 مىڭ مەكتەپتە قولدانىلاتىن بولادى»، - دەدى مينيستر پەداگوگتار مەن ءبىلىم جانە عىلىم سالاسى قىزمەتكەرلەرىنىڭ رەسپۋبليكالىق تامىز كەڭەسى بارىسىندا.
