ەلباسىنىڭ تەگىن تەحنيكالىق جانە كاسىپتىك ءبىلىم بەرۋدى ەنگىزۋ تۋرالى وتە ماڭىزدى تاپسىرماسى ءتيىمسىز جۇزەگە اسىرىلۋدا. بۇل تۋرالى قر پرەمەر-ءمينيسترىنىڭ ورىنباسارى ەرالى توعجانوۆ ايتتى, دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
جاستاردىڭ تەحنيكالىق جانە كاسىپتىك ءبىلىم بەرۋمەن قامتىلۋى نەبارى 17 پايىزدى عانا قۇرايدى. ەلباسىنىڭ تەگىن تەحنيكالىق جانە كاسىپتىك ءبىلىم بەرۋدى ەنگىزۋ تۋرالى وتە ماڭىزدى تاپسىرماسى ءتيىمسىز جۇزەگە اسىرىلۋدا. دۋالدى وقىتۋ دا بارىنشا قارقىندى دامىپ وتىرعان جوق. ستۋدەنتتەردىڭ تاجىريبەسى ءجيى فورمالدى تۇردە ۇيىمداستىرىلادى»، - دەدى ەرالى توعجانوۆ پەداگوگتار مەن ءبىلىم جانە عىلىم سالاسى قىزمەتكەرلەرىنىڭ رەسپۋبليكالىق تامىز كەڭەسى بارىسىندا.
وسى رەتتە ۇكىمەت باسشىسىنىڭ ورىنباسارى تەحنيكالىق جانە كاسىپتىك ءبىلىم بەرۋدى دامىتۋ بويىنشا تۇبەگەيلى شەشىمدەر قابىلداۋ قاجەتتىگىن ايتتى. «جاس مامان» جوباسى دا ۇلكەن ولقىلىقتارمەن جۇزەگە اسىرىلىپ جاتىر. جاستاردى جۇمىسپەن قامتۋ جانە ەكونوميكانى ءارتاراپتاندىرۋ ءۇشىن كاسىپتىك جانە تەحنيكالىق ءبىلىم بەرۋدى دامىتۋ بويىنشا تۇبەگەيلى شەشىمدەر قابىلداۋدى وتىنەمىن. ۇلتتىق بىلىكتىلىك جۇيەسى اياسىندا بەيرەسمي ءبىلىم بەرۋدىڭ بارلىق نۇسقاسىن بەلسەندى ەنگىزۋ قاجەت.
بۇل وتە ماڭىزدى ماسەلە. سوندىقتان بەيرەسمي ءبىلىم بەرۋدىڭ بارلىق نۇسقاسىن جان-جاقتى ەنگىزگەن ءجون«، - دەدى ەرالى توعجانوۆ. ونىڭ اتاپ وتۋىنشە، ەكونوميكالىق ىنتىماقتاستىق جانە دامۋ ۇيىمىنىڭ مالىمەتتەرىنە سايكەس، ەلىمىزدەگى جوعارى ءبىلىم بەرۋ جۇيەسى وسى دەڭگەيدە دامي بەرەتىن بولسا، وندا 25 جىلدان كەيىن قازاقستاننىڭ ەرەسەك تۇرعىندارىنىڭ 10 پايىزى وقۋ جانە ماتەماتيكالىق ساۋاتتىلىق داعدىلارىنان ايىرىلادى. «نەگىزىنەن جوعارى وقۋ ورىندارى باسشىلارىنىڭ ءتيىمسىز مەنەدجمەنتى سالدارىنان جوعارى ءبىلىم ساپاسىنىڭ تومەندەپ بارا جاتقاندىعىن بايقايمىز.
سوندىقتان جاستار شەتەلدە ءبىلىم الۋدى قالايدى. ۋنيۆەرسيتەتتەر جۇمىسىنىڭ باستى ۇستانىمى - زەرتتەۋ ارقىلى وقىتۋ ورىندالمايدى. جوو-لاردىڭ عىلىمي-زەرتتەۋ جۇمىستارى وتە ءالسىز دەڭگەيدە ۇيىمداستىرىلادى. تولىقتاي العاندا، ءبىلىم بەرۋ جۇيەسىندە ءبىزدىڭ ءبىلىم بەرۋىمىز باسەكەلەستىك دەڭگەيگە شىعىپ، ساپالى ءبىلىمدى قامتاماسىز ەتۋى ءۇشىن جۇيەلى شارالار قابىلداۋ قاجەت»، - دەدى پرەمەر-ءمينيستردىڭ ورىنباسارى.
