Elbasynyń taǵy bir tapsyrmasy tıimsiz júzege asyrylýda

961

Elbasynyń tegin tehnıkalyq jáne kásiptik bilim berýdi engizý týraly óte mańyzdy tapsyrmasy tıimsiz júzege asyrylýda. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy  «Adyrna» ulttyq portaly QazAqparatqa silteme jasap.

Jastardyń tehnıkalyq jáne kásiptik bilim berýmen qamtylýy nebári 17 paıyzdy ǵana quraıdy. Elbasynyń tegin tehnıkalyq jáne kásiptik bilim berýdi engizý týraly óte mańyzdy tapsyrmasy tıimsiz júzege asyrylýda. Dýaldy oqytý da barynsha qarqyndy damyp otyrǵan joq. Stýdentterdiń tájirıbesi jıi formaldy túrde uıymdastyrylady», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblıkalyq tamyz keńesi barysynda.

Osy rette Úkimet basshysynyń orynbasary tehnıkalyq jáne kásiptik bilim berýdi damytý boıynsha túbegeıli sheshimder qabyldaý qajettigin aıtty. «Jas maman» jobasy da úlken olqylyqtarmen júzege asyrylyp jatyr. Jastardy jumyspen qamtý jáne ekonomıkany ártaraptandyrý úshin kásiptik jáne tehnıkalyq bilim berýdi damytý boıynsha túbegeıli sheshimder qabyldaýdy ótinemin. Ulttyq biliktilik júıesi aıasynda beıresmı bilim berýdiń barlyq nusqasyn belsendi engizý qajet.

Bul óte mańyzdy másele. Sondyqtan beıresmı bilim berýdiń barlyq nusqasyn jan-jaqty engizgen jón«, - dedi Eraly Toǵjanov. Onyń atap ótýinshe, Ekonomıkalyq yntymaqtastyq jáne damý uıymynyń málimetterine sáıkes, elimizdegi joǵary bilim berý júıesi osy deńgeıde damı beretin bolsa, onda 25 jyldan keıin Qazaqstannyń eresek turǵyndarynyń 10 paıyzy oqý jáne matematıkalyq saýattylyq daǵdylarynan aıyrylady.  «Negizinen joǵary oqý oryndary basshylarynyń tıimsiz menedjmenti saldarynan joǵary bilim sapasynyń tómendep bara jatqandyǵyn baıqaımyz.

Sondyqtan jastar shetelde bilim alýdy qalaıdy. Ýnıversıtetter jumysynyń basty ustanymy - zertteý arqyly oqytý oryndalmaıdy. JOO-lardyń ǵylymı-zertteý jumystary óte álsiz deńgeıde uıymdastyrylady. Tolyqtaı alǵanda, bilim berý júıesinde bizdiń bilim berýimiz básekelestik deńgeıge shyǵyp, sapaly bilimdi qamtamasyz etýi úshin júıeli sharalar qabyldaý qajet», - dedi Premer-Mınıstrdiń orynbasary.

 

Pikirler
Redakııa tańdaýy