بۇگىن - ۆالس پاتشاسى ءشامشى قالداياقوۆتىڭ تۋعان كۇنى!

4829
Adyrna.kz Telegram

بۇگىن، 15 تامىز – قازاق دالاسىن انمەن تەربەتكەن ۆالس پاتشاسى ءشامشى قالداياقوۆتىڭ تۋعان كۇنى. اكەسى ءاناپيا «ۇلىم بولسا،ءجامشيد پاتشانىڭ ەسىمىن بەرەمىن» دەيدى. كوپ ۇزاماي اكە تىلەگى ورىندالىپ،  اتۇستارى دۇنيەگە كەلەدى. سول پەرزەنت ءجامشيد پاتشاداي ەل بيلەمەسە دە، انىمەن جۇرەكتەردى بيلەپ، ءان الەمىنىڭ پاتشاسىنا اينالدى.

بۇگىندە سازگەردىڭ ارتىندا قوس ۇلى قالدى. كىشى ۇلى مۇحتار قالداياقوۆ اباي اتىنداعى گاتوب-تا ديريجەر قىزمەتىن اتقارادى. ول «ادىرنا» ۇلتتىق پورتالىنىڭ تىلشىسىمەن اڭگىمەلەسىپ، ەستەلىكتەرىمەن ءبولىستى.

اكەم بالالارىنىڭ ونەر جولىندا جۇرگەنىن قالادى

-مەن ءۇشىن اكەم الەمدەگى ەڭ جاقسى، ەڭ قامقور، ەڭ مەيىرىمدى ادام. ول اعام ەكەۋمىزدى «تۇلعا» رەتىندە تاربيەلەي الدى. بالالارىنىڭ ونەر جولىندا جۇرگەنىن قالاپ، كۇلاش بايسەيىتوۆا اتىنداعى ونەر مەكتەبىنە وقۋعا ءتۇسىردى. ءبىزدى جامبىل،تاشكەنت،سامارقاند سىندى قالالارعا اپارىپ، ءار ءوڭىردىڭ مادەنيەتىمەن تانىستىردى. كىشكەنتاي جەتىستىگىمىزگە بالاشا قۋانۋشى ەدى. اكەمىزدىڭ ارمانى ورىندالدى. قازىرگى تاڭدا ءبىز ونەر الىمىنەن الىس ەمەسپىز. اكەمنىڭ نەمەرەلەرى دە ونەر جولىندا ءجۇر. ۇلكەن اعامنىڭ قىزى ايسۇلۋ - قۇرمانعازى اتىنداعى قازاق ۇلتتىق كونسەرۆاتورياسىنىڭ وقىتۋشىسى، PhD دوكتور. مەنىڭ بالالارىماباي،الينا،نۇرسۇلتان دا ءان جازادى. الايدا, ءومىر بويى مۋزىكانت بولۋ قيىن عوي. سول ءۇشىن دە ولاردىڭ باسقا دا عىلىم سالالارىن يگەرگەنىن قالايمىن.

ءار تۋىندىسىن ماحابباتپەن جازدى

-ءشامشى بار عۇمىرىن انگە ارنادى. جاس كەزىنەن ونەر جولىندا ءجۇرىپ، ءبىراز ىزدەندى. قۇرمانعازى اتىنداعى كونسەرۆاتورياعا ءتۇسىپ، قابىلەتىن شىڭدادى. ءار تۋىندىسىن ماحابباتپەن، اسقان جاۋاپكەرشىلىكپەن جازۋشى ەدى. وسىلايشا, ءان الەمىندە وزىندىك قولتاڭباسىن قالدىرىپ كەتتى.

راسىندا، ۇلى دارىن ومىردەن وتكەنىمەن، كوڭىلدەن كەتپەدى. سازگەردىڭ مۋزىكا ونەرىندە ورنى ەرەكشە 300-گە جۋىق ءانى بار. ونىڭ ءار تۋىندىسى ءوز ومىرىمەن بىتە قايناسىپ تۋعان.

«انا تۋرالى جىر»-دىڭ 25 نۇسقاسىن جازعان

«انا تۋرالى جىر» ءانىنىڭ دۇنيەگە كەلۋىنە اناسىنىڭ مەزگىلسىز دۇنيە سالۋى سەبەپ بولدى. بۇل تۋرالى ءشامشءى «انام بالاسىنىڭ قىزىعىن كورە الماي، ومىردەن ءوتتى. وسى مەنىڭ جانىما قاتتى باتتى. سوندىقتان ول كىسىگە ارناپ ءبىر ءاننىڭ 25 ۆاريانتىن جازدىم. ەڭ سوڭىندا قازىر ءوزىم ورنىنداعالى تۇرعان نۇسقاسىنا توقتادىم»,-دەيدى.

«اق بانتيك» - تويعا تارتۋ ەتكەن ءان

بىردە سازگەردىڭ قاراجان ءابىلازيموۆ ەسىمدى دوسى شاڭىراق كوتەرەدى. ونىڭ جۇبايى جاڭادان مەكتەپ بىتىرگەن بالاۋسا قىز ەكەن. وسىنى ارقاۋ ەتىپ، سازگەر «اق بانتيك» ءانىن دۇنيەگە اكەلىپ، جاستاردىڭ تويىندا تارتۋ ەتەدى.

«قايىقتا»

«قايىقتا» ءانىنىڭ شىعۋ تاريحى دا قىزىق. «1957 جىلى جاس كومپوزيتورلاردىڭ اندەرىنەن رەسپۋبليكالىق بايقاۋ وتەتىن بولدى. بىردە اقىن ن. الىمقۇلوۆ ەكەۋمىز الماتىداعى گوركي پاركىنە كول جاعاسىنا دەمالۋعا باردىق. كول بەتىندە ەكەۋ – ەكەۋ جاراسقان جاستار قايىقپەن تەربەلە ءجۇزىپ ءجۇر. وسى ءبىر اسەم كورىنىس كوڭىلگە ءان ۇيالاتىپ، ومىرگە «قايىقتا» ءانى كەلدى»,- دەيدى سازگەردىڭ ءوزى.

وسى ءانىم بولاشاقتا گيمن بولادى...

ال ەلىمىزدىڭ ءانۇرانىنا اينالعان «مەنىڭ قازاقستانىم» ءانىن جازعاندا ءشامشى 26 جاستا ەدى. العاشقى ورىنداۋشىسى - جامال وماروۆا. بۇل ءان كوپشىلىكتىڭ كوڭىلىنەن بىردەن شىعادى. ءشامشى دە ءبىر سوزىندە «وسى ءانىم بولاشاقتا گيمن بولادى» دەگەن ەكەن. 1986 جىلى جەلتوقسانشىلارعا ەرەكشە رۋح بەرگەن، ولاردىڭ ۇرانى بولعان ءان 50 جىلدان كەيىن قازاقستان رەسپۋبليكاسىنىڭ ءانۇرانىنا اينالدى.

«حالقىم باردا اندەرىم دە بار» دەپ كەتكەن ءشامشى بۇگىندە ءان بولىپ قازاق اسپانىندا قالىقتاپ قالدى.. اتامىزدىڭ 90 جىلدىق مەرەيتويى قۇتتى بولسىن!

 

ديانا اسان،

«ادىرنا» ۇلتتىق پورتالى

پىكىرلەر