بۇگىن قازاقتىڭ ۇلى اقىنى ابايدىڭ 175 جىلدىق مەرەيتويى. وسىعان وراي قر مەملەكەتتىك حاتشىسى قىرىمبەك كوشەرباەۆ باستاعان ءبىر توپ مەملەكەت جانە قوعام قايراتكەرى ەلورداداعى اباي ەسكەرتكىشىنە سالتاناتتى جاعدايدا گۇل شوقتارىن قويدى، دەپ حابارلايدى “ادىرنا” قازاقپاراتقا سىلتەمە جاساپ.
گۇل شوقتارىن قويۋ راسىمىنە قر پرەزيدەنتى اكىمشىلىگى باسشىسىنىڭ ورىنباسارى داۋرەن اباەۆ، قر پرەمەر-ءمينيسترىنىڭ ورىنباسارى ەرالى توعجانوۆ، مادەنيەت جانە سپورت ءمينيسترى اقتوتى رايىمقۇلوۆا، ەلوردا اكىمى التاي كولگىنوۆ، قر پرەزيدەنتىنىڭ ءباسپاسوز حاتشىسى بەرىك ءۋالي، ءماجىلىس دەپۋتاتى ساۋىتبەك ابدىراحمانوۆ قاتىستى. مۇنداي سالتاناتتى ءراسىم ەلىمىزدىڭ بارلىق وڭىرىندە وتكىزىلدى.
ايتا كەتەيىك، تاياۋدا قازاقستان ۇكىمەتىنىڭ قاۋلىسىمەن 10 تامىز اباي كۇنى بولىپ بەلگىلەندى. وسىلايشا، مەملەكەت باسشىسى قاسىم-جومارت توقاەۆتىڭ تاپسىرماسىمەن ۇكىمەت اباي كۇنىن بەلگىلەپ، ەلىمىزدىڭ اتاۋلى مەرەكەلەر تىزبەسىنە ەنگىزدى. مۇنداعى باستى ماقسات - ابايدى ۇلتىمىزدىڭ رۋحاني رەفورماتورى، الەمدىك دەڭگەيدەگى كەمەڭگەر رەتىندە تەڭدەسسىز شىعارماشىلىعىن ناسيحاتتاۋ.
«ادىرنا» ۇلتتىق پورتالى
