Búgin qazaqtyń uly aqyny Abaıdyń 175 jyldyq mereıtoıy. Osyǵan oraı QR Memlekettik hatshysy Qyrymbek Kósherbaev bastaǵan bir top memleket jáne qoǵam qaıratkeri elordadaǵy Abaı eskertkishine saltanatty jaǵdaıda gúl shoqtaryn qoıdy, dep habarlaıdy “Adyrna” QazAqparatqa silteme jasap.
Gúl shoqtaryn qoıý rásimine QR Prezıdenti Ákimshiligi basshysynyń orynbasary Dáýren Abaev, QR Premer-Mınıstriniń orynbasary Eraly Toǵjanov, Mádenıet jáne sport mınıstri Aqtoty Raıymqulova, elorda ákimi Altaı Kólginov, QR Prezıdentiniń baspasóz hatshysy Berik Ýálı, Májilis depýtaty Saýytbek Abdyrahmanov qatysty. Mundaı saltanatty rásim elimizdiń barlyq óńirinde ótkizildi.
Aıta keteıik, taıaýda Qazaqstan Úkimetiniń qaýlysymen 10 tamyz Abaı kúni bolyp belgilendi. Osylaısha, Memleket basshysy Qasym-Jomart Toqaevtyń tapsyrmasymen Úkimet Abaı kúnin belgilep, elimizdiń ataýly merekeler tizbesine engizdi. Mundaǵy basty maqsat - Abaıdy ultymyzdyń rýhanı reformatory, álemdik deńgeıdegi kemeńger retinde teńdessiz shyǵarmashylyǵyn nasıhattaý.
«Adyrna» ulttyq portaly
