الەكساندر لۋكاشەنكو:  مەنى اتىپ كەتۋى دە مۇمكىن

2708
Adyrna.kz Telegram

ەرتەڭ 9 تامىز بەلورۋسسيادا پرەزيدەنتتىك سايلاۋ. بۇكىل ەل، ەۋروپا عانا ەمەس، تورتكۇل قۇرلىقتاعى ساياساتقا الاڭدايتىن ادام بالاسى بەلارۋس ەلىندەگى سايلاۋعا الاڭداپ وتىر.  وسى ورايدا تانىمال جۋرناليست دميتري گوردوننىڭ الەكساندر لۋكاشەنكومەن سۇحباتى جاريالاندى.  

كوپتى قىزىقتىرعان ساۋال: 26 جىل ەلدى باسقارعان الەكساندر لۋكاشەنكو تاعى دا پرەزيدەنت بولا الا ما؟ بۇل تۋرالى ءوزىنىڭ ويى قانداي؟  مينسك كوشەلەرىندە نەگە ارازىلىق ءورشىپ تۇر؟

سۇحبات بارىسىندا بەلارۋس پرەزيدەنتى الەكساندر لۋكاشەنكو رەسەيمەن، پۋتينمەن ارا قاتىناس، ۋكرايناداعى، دونباسس، قىرىم ماسەلەلەرىن ءجيى ءسوز ەتتى.

رەسەيدىڭ جالدامالىلارى مينسكىدە بەكەر جۇرمەگەنىن ايتقان لۋكاشەنكو ولاردى   كەيبىر قالتالى توپتاردىڭ استىرتىن قولداپ وتىرعانىن ءمالىم ەتتى. پرەزيدەنتتىك سايلاۋعا ءتۇسىپ جاتقان كانديداتتاردىڭ رەسەيگە بۇيرەگى بۇراتىنىن دا جاسىرمادى. لۋكاشەنكو وپپوزيتسيانىڭ اتىنان سىنعا ءتۇسىپ جاتقان سۆەتلانا تيحونوۆسكايانىڭ «دۇرىسى  كوتلەت ءپىسىرىپ،  ۇيدە وتىرعانىن» ءجون كورەدى.

ول بەلورۋسسيادا پرەزيدەنتتىك سايلاۋ بارىسىندا ۋكرايناداعىداي جاعدايدىڭ قايتالانۋىنا جول بەرمەيدى.  لۋكاشەنكو پرەزيدەنتتىك ومىردەن باسقا ءومىردى كوزىنە ەلەستەتە  المايتىنىن ايتتى.

ەڭ باستى سۇراق: ەگەر بەلورۋسسيادا  مايدان بولىپ، قانداي دا ءبىر اگرەسسور جاعدايدى تۇراقتاندىرۋ ءۇشىن ەل اۋماعىنا باسا-كوكتەپ كىرسە، الەكساندر لۋكاشەنكونىڭ  قاشۋى مۇمكىن بە؟  سۇحباتتان قىسقاشا نۇسقا...

-ەگەر قانداي دا ءبىر ەل بەلارۋس تەرريتورياسىنا كوز الارتسا،  بىرىنشى بولىپ وق اتاسىز با؟

­–مەن ەشقاشان ءبىرىنشى بولىپ وق اتپايمىن. بۇل – ۇلكەن اقىماقتىق،  بۇل جاۋلارىما بەرىلگەن  توسىن سىي بولار ەدى. ماسەلەنىڭ الدىن الۋ ءۇشىن وق  اتقانعا دەيىن تالاي نۇسقا، مۇمكىندىكتەر بولادى. ەگەر  ولاردىڭ ءبارى جويىلىپ، تىعىرىققا تىرەلەر بولساق،  كۇمانسىز وق اتۋعا تۋرا كەلەدى.

قازىر بىزدە وتە قاۋىرت كەزەڭ. «لۋكاشەنكو قاشۋى مۇمكىن»  دەگەن ءارتۇرلى قاڭقۋ سوزدەر ءجۇرىپ  جاتىر. مەن ءوزىم تۋىپ، وسكەن تاۋەلسىز ەلدەن قاشپايمىن. بالام دا ەشقايدا كەتپەيدى.

مەندە سايلاۋ الدىندا ەشقانداي ىشكى قورقىنىش بولمايدى. ەرتەڭ كوشەدە قانداي دا ءبىر نارازىلىق ءورشىپ، ولارعا قارسى ءارتۇرلى قاتال شارالار قابىلداپ جاتساق، بۇل ماعان ىڭعايسىزدىق تۋدىرادى. بۇل ەل يميدجىنە نۇقسان كەلتىرەدى. قازىر وسى جاعداي مەنى الاڭداتادى.

بارلىعى دا بولۋى ىقتيمال. بىراق قانداي وقيعا بولسا دا، ەشقايدا قاشپايمىن. مەنى  اتىپ كەتۋى  دە مۇمكىن. مىسالى، سەن (گوردونعا قاراپ-رەد) ءوزىڭدى ماڭگىلىك ءومىر  سۇرە الاتىن  اداممىن دەپ ويلايسىڭ با؟ قازىر بارلىق ماسەلە لۋكاشەنكوعا قاراي  باعىتتالىپ وتىر. سوندىقتان  ەلدە كۇتپەگەن وقيعا ورىن الۋى ىقتيمال. بىراق بىزدە، كوشەدە ادامدارعا قارسى وق اتىلادى دەگەن نارسە قيسىنعا كەلمەيدى، – دەدى لۋكاشەنكو.

«سايلاۋعا بىرەر كۇن  قالعاندا، ءسىز بەلورۋسسيانىڭ پرەزيدەنتى بولامىن دەپ، نىق  ايتا الاسىز با؟» دەگەن دميتري گوردوننىڭ ساۋالى لۋكاشەنكوعا  وڭاي تيمەگەنى  سۇحبات بارىسىندا بايقالىپ قالدى.

–ارينە،  كىمنىڭ پرەزيدەنت بولاتىنىن ايتا الامىن، بىراق ونىڭ قازىر كەرەگى نە؟،- دەپ قىسقا قايىردى الەكساندر لۋكاشەنكو.

26 جىل مەملەكەت باسىندا بولعان  لۋكاشەنكو بارىنەن جالىعىپ، كەيدە ءوزى ءۇشىن ءومىر سۇرگىسى كەلمەي مە؟

–بۇل تۋرالى دا ويلانعان كەزدەر بولدى. بىراق مەن  باسقاشا ءومىر سالتىن كوز الدىما ەلەستەتە المايمىن. ارينە، مەملەكەت باسقارۋ  وتە اۋىر.  كەزىندە ماعان وسى ءتارىزدى ساۋال قويىلدى. ەگەر بوس بولسام، ادامداردى ەمدەر ەدىم. حيرۋرگ، دارىگەرلەر بىزدە جەتكىلىكتى. بىراق ادامدى پسيحوزدان، ساناداعى ۇرەيدەن ەمدەۋ كەرەك. حالىق بۇل  ومىردە تىنىش، بايسالدى ءومىر سۇرسە دەيمىن.

ساياسات،  كەزدەسۋلەر،  جيىندار...  ۇزاق جىل مەملەكەت باسقاردىڭىز. مەمۋار جازار ما ەدىڭىز؟

–جوق.  بۇل تۇرعىدا مەن جالقاۋمىن.  ەگەر بۇعان قاتىستى پىكىرىم وزگەرىپ جاتسا، جانىمدا جۇرگەن ازاماتتارعا ءوتىنىش جاساۋىم مۇمكىن.

ر.S, سۇحبات بارىسىندا ايقىن اڭعارىلعانى، بەلارۋستىڭ  «باتكاسى»، «ەۋروپانىڭ ەڭ سوڭعى ديكتاتورى» اتانعان الەكساندر لۋكاشەنكو وڭايلىقپەن بيلىكتى بەرمەيدى. ەرتەڭ – سايلاۋ.  اقىرىن كۇتەيىك...

 

ەركىن قالدان، «ادىرنا» ۇلتتىق پورتالى

 

 

 

 

پىكىرلەر