شىمكەنت قالاسىنداعى ەمحانالار جانىنان قۇرالعان ءموبيلدى توپتار 53 مىڭ ناۋقاستى تەگىن دارىمەن قامتاماسىز ەتتى. مەديتسينا ماماندارى دارىلىك زاتتاردى ديسپانسەرلىك ەسەپتە تۇراتىن ناۋقاستاردىڭ ۇيىنە جەتكىزىپ بەرگەن.
ءموبيلدى توپ قىزمەتكەرلەرى تاۋلىك بويى جۇمىس جسايدى. بۇگىنگى تاڭعا دەيىن 17 مىڭنان اسا ناۋقاستىڭ ۇيىنە بارىپ، مەديتسينالىق قىزمەت كورسەتكەن.
قازىر قالاداعى ەمحانالاردا 211 ءموبيلدى توپ قالا تۇرعىندارىنا مەديتسينالىق قىزمەت كورسەتۋدە.
بۇدان بولەك، ماماندار 608 831 ادامعا مەديتسينالىق قاجەتتىلىكتەرى بويىنشا قوڭىراۋ شالعان.
ايتا كەتۋ كەرەك، ءموبيلدى توپتار حالىققا مىنانداي قىزمەتتەر كورسەتەدى:
- ناۋقاستى تەكسەرۋ، ونىڭ جاعدايىن باعالاۋ;
- COVID-19 كۇدىكتى ناۋقاستاردى جەدەل جانە پتر-تەستىلەۋ;
- كورسەتكىشتەر بويىنشا رەنتگەنوگرافياعا نەمەسە كومپيۋتەرلىك توموگرافياعا جولداما بەرۋ;
- قانداعى وتتەگىمەن قانىقتىرۋ 93% تومەندەگەن جاعدايدا يمپۋلستىك وكسيمەتريانى جۇرگىزۋ، قاجەتتى مامانمەن اۋديو نەمەسە ۆيدەو كەڭەس بەرۋدى ۇيىمداستىرۋ;
- «كوروناۆيرۋستىق ينفەكتسيا COVID-19» دياگنوزى مەن ەمى ءۇشىن كلينيكالىق حاتتاماعا سايكەس ءدارى-دارمەكتەردى تاعايىنداۋ;
- ۇيدە ەمدەۋ نەمەسە ستاتسيونارعا جاتقىزۋ تۋرالى ماسەلەنى شەشۋ.
شىمكەنت قالاسى اكىمىنىڭ ءباسپاسوز قىزمەتى
