بەلگىلى جازۋشى، قوعام قايراتكەرى مىرزاگەلدى كەمەل ومىردەن وزدى. قالامگەردىڭ قازاسىن وقىرماندارى مەن بەلگىلى ادەبيەتشىلەر ەستىرتتى.
جىلبەك سەنبەكۇلى: مىرزاگەلدى اعانىڭ دا بۇ جالعانداعى تۇز-ءدامى تاۋسىلىپتى. مىنگەنىڭىز پىراق، اينالاڭىز شىراق، مەكەنىڭىز جۇماق بولسىن، اسىل دا ، ارداقتى اعا!
مىرزاگەلدى اعانىڭ وزىنەن بۇرىن ەڭبەكتەرىمەن تانىستىق. 2008 جىلى اتى دا، زاتى دا بولەك "اقىل قالتا" كىتابىن كوپەن اعا سىيلاعان. كوپ ۋاقىت وتپەي وزىمەن دە داستارحان باسىندا ديدارلاسىپ، شۇيىركەلەستىك. سودان بەرى كىتابى قولىمىزدان، ەسىمى جۇرەگىمىزدەن تۇسكەن ەمەس.
ۇلكەن-كىشىگە بىردەي ءسىز دەپ سويلەيتىن كوركەم مىنەزدى كوكەمە جاراتقان جəننات ءنəسىپ ەتكەي! وتباسىنا، تۋعان-تۋىستارىنا قايعىرىپ كوڭىل ايتامىز."اقىل قالتادان":
ادام قانداي بولسا، ءسوزى سونداي. "ادامدى دوسىنا قاراپ تانى" دەگەن ءسوز بار.بىراق، ادامنىڭ دوسىنا عانا قاراپ ەمەس، جاۋىنا قاراپ تا كىم ەكەنىن تانۋعا بولادى.
***
ادام اعىن سۋ ەمەس. اعىن سۋ ارتىنا قاراي المايدى. ارتىڭا قارا، ءىزىڭ قانداي بولىپ ءتۇسىپتى، ءۇڭىل.
***
وتكەنىڭدى جىبەرىپ العان قاتەلىكتەرىڭدى بولدىرماۋ ءۇشىن عانا ەسىڭە ءتۇسىر.
***
ەكى قۇلاققا ءبىر ءتىل كەلەتىنى - ەكى ەسە تىڭداپ، ءبىر رەت سويلە دەگەنى ەمەس پە؟!
***
قالاي سويلەۋدى ۇيرەنۋ قانشالىقتى كەرەك بولسا، قالاي، قاي جەردە سويلەمەۋ سونشالىقتى كەرەك...
ايتا كەتەيىك، مىرزاگەلدى كەمەل 1949 جىلى تۇركىستان وبلىسى، ماقتاارال اۋدانىندا دۇنيەگە كەلگەن. پرەزيدەنت جانە "الاش" سىيلىعىنىڭ لاۋرەاتى. ەكونوميكا عىلىمىنىڭ دوكتورى، پروفەسسور.
"ادىرنا" ۇلتتىق پورتالىنىڭ ۇجىمى جازۋشىنىڭ جاقىندارىنا كوڭىل ايتادى. باقۇل بولىڭىز.
