ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ايتۋىنشا، كارانتينگە قاتىستى شەكتەۋلەر سالدارىنان تابىسسىز، جالاقىسىز قالعان ازاماتتارعا ەڭ تومەنگى جالاقى كولەمىندە ءبىر رەتتىك كومەك بەرۋ تۋرالى شەشىم قابىلداندى. ونىڭ كولەمى - 42 500 تەڭگە.
مينيستر ءوتىنىش بەرۋگە ارنالعان ەلەكتورندى پورتال وسى اپتانىڭ بەسىنشى كۇنىنە دەيىن دايىن بولاتىنىن، تۇرعىندارعا ازىرگە اسىقپاۋىن ءوتىندى. اقشا اۋدارۋ 20 شىلدەدەن باستاپ جۇزەگە اسا باستايدى.
«حالىقتىڭ تاراپىنان ءتۇسىپ جاتقان سۇراقتارعا قىسقاشا جاۋاپ بەرەيىن. تولەم بۇل جولى كىمدەرگە تولەنەدى؟ بۇل جولعى 42 500 تولەم توتەنشە جاعداي كەزىندەگى قاعيداتقا ساي تولەنەدى. ياعني، جۇمىس ىستەپ ءجۇرىپ، تابىسىنان، الىپ جۇرگەن جالاقىسىنان ايىرىلعان ازاماتتارعا تولەنەدى.
قاشان تولەنەدى؟
بۇل جولعى تولەم جاساۋدىڭ وپەراتورى رەتىندە تاعى دا مەملەكەتتىك الەۋمەتتىك ساقتاندىرۋ قورى بەلگىلەندى. وتكەندە بۇل قوردىڭ قارجىلىق جاعدايى تۋرالى ايتقانبىز. قارجى ماسەلەسى قيىن. بىراق، بۇگىن شەشىم قابىلداندى. ۇلتتىق بانك ۇكىمەتپەن بىرلەسىپ ءبىر اپتا ىشىندە قوردىڭ قارجىىق جاعدايىن شەشۋى كەرەك. وعان دەيىن ءبىز ءوتىنىش قابىلدايتىن پورتالداردى دايىندايمىز. وسى جۇما كۇنى بۇكىل پورتال ءوتىنىش بەرۋگە دايىن بولۋى كەرەك. سول كۇننەن باستاپ ءوتىنىش قابىلداۋ باستالادى. ال، 20 شىلدەدەن باستاپ تولەمدەردى اۋدارۋعا كىرىسەمىز. ازىرگە، ەلەكتروندى ۇكىمەتكە، 42 500 سايتىنا كىرىپ، اۋرە بولماڭىزدار. پورتالداردى ءبىز جۇماعا دەيىن دايىنداۋعا تىرىسامىز، تولەم 20 شىلدەدەن باستالادى دەگەن ءۇمىت بار»، - دەدى نۇرىمبەتوۆ.
