كوروناۆيرۋس پاندەمياسى كۇننەن-كۇنگە ءورشىپ بارادى. بۇل ىندەت ەلىمىزدىڭ بىرلىگى مەن ىنتىماعىن دا سىنعا العانداي.
دانا حالقىمىز سىنالار ساتتە ۆيرۋستى جەڭۋگە بەلسەنە اتسالىسىپ، ءبىر-بىرىنە قول ۇشىن سوزۋدا.
«ادىرنا» ۇلتتىق پورتالى توتەنشە جاعداي كەزىندە جاسالعان جاقسىلىقتاردىڭ ءبىر پاراسىن نازارلارىڭىزعا ۇسىنادى.
كارانتيننىڭ العاشقى كۇندەرىندەگى كومەك
ەلىمىزگە توتەنشە جاعداي ەنگىزىلگەن كۇننەن باستاپ اكىمدىكتەر مەن ۆولونتەرلەر، كاسىپكەرلەر مەن تانىمال ادامدار مۇقتاج وتباسىلارعا ازىق-تۇلىك پەن گيگيەنالىق پاكەتتەر تاراتقان بولاتىن. «جاس وتان» جاستار قاناتىنىڭ ەرىكتىسى ءبيبىنۇر شەرنياز «ءبىز بىرگەمىز» چەللەندجىن باستاپ، ءوز قولىمەن تىككەن ماسكالاردى الەۋمەتتىك جۇمىسشىلارعا تەگىن ۇلەستىردى. بۇل اكتسيا ەلىمىزدىڭ تۇكپىر-تۇكپىرىندە ءوز جالعاسىن تاپتى. وسى ورايدا بەلگىلى ديزاينەر، مارقۇم بەرىك يسمايلوۆ تا ۇلكەن ۇلەس قوسىپ، قازاق حالقىنىڭ جۇرەگىندە ءوزىنىڭ مارتتىگىمەن ەستە قالدى. ال ارداق نازاروۆ، تۇرسىنبەك قاباتوۆ، مارجان اراپباەۆا، بەركۋت، گۇلزيرا ايداربەكوۆا سىندى تانىمال ادامدار ەرىكتى تۇردە از قامتىلعان وتباسىلارعا كومەكتەسىپ، حالىقتىڭ العىسىنا بولەندى. ەلباسىمىزدىڭ باستاماسىمەن قۇرىلعان «Biz Birgemiz» قورىنا تيمۋر قۇلىباەۆ 10 ملن دوللار، كەڭەس راقىشەۆ 1 ملن دوللار، عالىمجان ەسەنوۆ، ايدىن راحىمباەۆ، راشيد سارسەنوۆ قارجى اۋداردى.
داۋلەتتىڭ وقىرماندارى ەرلەدى
كارانتين كەزىندە داۋلەت تولەۋتايۇلىنىڭ اتقارعان جۇمىسىن ەرەكشە اتاپ وتكەن ءجون. بلوگەر وقىرماندارىنىڭ كومەگىمەن 400 وتباسىعا ازىق-تۇلىك تاراتتى. رامازان ايىندا 100 ميلليون تەڭگەگە قايىرىمدىلىق جاسالدى. ماقتاارال اۋدانىن سۋ باسقان كەزدە دە «داۋلەتتەن» قايىرىمدىلىق قورى بەلسەندىك تانىتىپ، 24 ملن 297 مىڭ تەڭگەنى جيناعان بولاتىن. داۋلەت مىرزا «ادىرنا» ۇلتتىق پورتالىنا بەرگەن سۇحباتىندا وقىرماندارىمەن بىرگە وتتەگى اپپاراتتارىن ساتىپ الۋعا قارجى جيناپ جاتقانىن اتاپ ءوتتى:
- كارانتين ۋاقىتىندا مۇقتاج وتباسىلارعا ازىق-تۇلىك تاراتتىق. بۇگىندە ازىق-تۇلىك ەمەس، قينالىپ جاتقان جاندارعا وتتەگى اپپاراتتارىن ساتىپ الۋعا اقشا جيناپ جاتىرمىز. ءدال قازىرگى ۋاقىتتا 30 ميلليونعا جۋىق اقشا جينالىپ قالدى. ونىڭ 15 ميلليونعا جۋىعىنا اپپارات الۋ جوسپاردا بار. الداعى ۋاقىتتا قىتايدان 700 اپپارات كەلەدى.
مەديتسينا اقساپ تۇر: ءدارى تاپشى، وتتەگى اپپاراتتارى جەتىسپەيدى
ىندەت ۇدەي تۇسكەن شاقتا ەلىمىزدە ءدارى تاپشىلىعى پايدا بولىپ، ەمحانالاردا وتتەگى اپپارتتارىنىڭ جەتىسپەيتىنى انىقتالدى. اينۇر تۇرسىنباەۆا «AidynNury» قايىرىمدىلىق قورىنىڭ اتىنان 1 ميلليون، ءوز اتىنان 1 ميلليون تەڭگە ءبولىپ، قازاقستانعا جەتكىلىكسىز ءدارى-دەرمەكتەردى تۇركيادان جەتكىزۋدى قولعا الدى. سونىمەن قاتار، ايتىسكەر اقىن ەمحانالارداعى وتتەگى اپپاراتتارىنىڭ جەتىسپەيتىنىن العا تارتىپ،
وتانداستارىمىزدى قايىرىمدىلىق شاراسىنا شاقىردى. تۇرسىنباەۆانى ەلميرا ەشنيازوۆا، دينارا ساتجان, داۋلەت تولەۋتايۇلى، قايرات جولدىبايۇلى، جانات باقىت، التىناي جورابەكوۆا سىندى قوعام بەلسەندىلەرى قولدادى. وسىلايشا نەبارى بەس كۇننىڭ ۇشىندە 825 اپپاراتتىڭ اقشاسى جينالدى. بۇگىن تۇركيا مەملەكەتىنەن ەلىمىزگە 125 وتتەگى اپپاراتى كەلەدى. ەلىنە جاناشىر ادامدارعا ۇندەۋ جولداعان بەلگىلى ءدىنتانۋشى قايرات جولدىبايۇلى دا الەۋمەتتىك جەلىدە قۋانىشتى جاڭالىقپەن ءبولىستى:
- كەشە قازاقستاننىڭ بارلىق اي̆ماقتارىنان جاستار، كاسىپكەرلەر حابارلاسىپ اۋىلدارىنا، اۋداندارىنا، قالالارىنا ءبىر نەشە دانادان الاتىندارىن اي̆تىپ، اقشالارىن جىبەردى. ۇلەس قوسقان بارشا ازاماتتاردان اللا رازى بولسىن! 28 دانا وتتەگى كونتسەنتراتوردىڭ قارجىسىن جيناپ بەرگەن جاننات باقىت، اي̆رىقشا ۇلەس قوسقان كامشات بەكجىگىتوۆا قارىنداستارىما، قۇجاتتارىن رەتتەۋگە كومەكتەسىپ جاتقان بەرىك ۋاليگە، ۇندەۋىمىزدىڭ حالىققا كوبىرەك جەتۋىنە اتسالىسقان ساي̆لاۋ قاميەۆ، اي̆گۇل يمانباەۆا، اي̆بولات جانعالي، بەكجان تۇرىس، اي̆نۋر تۇرسىنباەۆا، ارداق نازاروۆ، سەرىك ابباس-شاح، ساكەن ماي̆عازيەۆ، دوسىمجان تاڭاتاروۆ، عادىلبەك جاناي، نۇركەن وتەۋىل، امانجول ءالتاي̆، التىنبەك ءابىش، قۇرماش ماحان، سەرىكزات دۇي̆سەنعازى، بەي̆بىت كۋشكاليەۆ، تاعى دا باسقا اتى اتالماعان ازاماتتارعا العىسىمدى بىلدىرەمىن. مۇنداي̆ شارالار حالىقتى تەك بىرىكتىرەدى. بارشاڭىزدان جاراتقان رازى بولسىن! سونىمەن ەكى كۇندە جينالعان قارجى 35 808 895 تەڭگە بولدى. بۇل اقشاعا اللا جازسا، 210 دانا وتتەگى كونتسەنتراتورىن الامىز. بۇگىن دە جىبەرەمىز دەپ ازاماتتار حابارلاسىپ جاتىر. زاۆودقا العاشقى پارتياسىنا كەشە تاپسىرىس بەرىلدى. ەندىگى پارتياسىنا اقشانى الدىمىزداعى سەي̆سەنبى تاڭەرتەڭ جىبەرەمىز. ودان كەي̆ىن قارجى جينالىپ جاتسا، كەلەسى پارتياسىنا تاعى دا جىبەرەتىن بولامىز.
ءبىر ادامنىڭ ءومىرىن الىپ قالۋ - بۇكىل الەمگە ءومىر سىيلاعانمەن بىردەي
وتتەگى اپپاراتتارىن ساتىپ الۋعا ءوز قالتاسىنان قارجى قوسقان ازاماتتاردىڭ ءبىرى - ايگۇل ورىنبەك. زاڭگەر سۇحبات بارىسىندا بيلىكتىڭ كوروناۆيرۋسپەن دۇرىس كۇرەسپەي جاتقانىن جەتكىزدى:
- قازاقتا "وڭ قولىم بەرگەندى سول قولىم بىلمەسىن" دەگەن كەرەمەت دانالىق ءسوز بار. شىنى كەرەك، وسى ۋاقىتقا دەيىن جاساعان قايىرىمدىلىقتارىمدى جاريا ەتپەپپىن. بۇل جولى حالقىمىزدىڭ مۇشكىل ءحالىن كورىپ، اشىندىم. بيلىكتە وتىرعان جاندارعا ساباق بولعانىن قالادىم. وزدەرىڭىز كورگەندەي، بۇل ىندەت مەنىڭ وتباسىمدى دا اينالىپ وتپەدى. اياق استىنان انامنىڭ وكپەسى قابىنىپ، اۋىرىپ قالدى. وكىنىشكە وراي، اۋرۋحانالار ءاناليزسىز انامدى قابىلدامايتىنىن ايتتى. ال ول اناليزدەر تەك ءبىر اپتادان كەيىن عانا دايىن بولادى ەكەن. وسىلايشا انامدى اۋرۋحانعا جاتقىزا الماي، 6 ساعات ساندالدىم. كوز الدىندا اناڭنىڭ اۋا جەتپەي ءسونىپ بارا جاتقانىن كورگەندە، شاراسىز قالادى ەكەنسىڭ. ءبىز «بىرگەمىز، بارلىعىن كەرەمەت جاساپ جاتىرمىز، بارلىعى باقىلاۋدا» دەپ جار سالىپ ءجۇرمىز، بىراق ەلىمىزدىڭ مەديتسيناسىنىڭ جاعدايى مىناۋ. ادامنىڭ ءولىپ جاتقانىن باقىلاپ وتىرعان اتقارۋشى بيلىك كىمگە كەرەك؟ قازىر حالىق قويشا قىرىلىپ جاتىر. وسى جاعدايدىڭ بارلىعىن كورە وتىرا قالاي مەن حالىققا كومەك بەرمەيمىن؟ ءبىر ادامنىڭ ءومىرىن الىپ قالۋ - بۇكىل الەمگە ءومىر سىيلاعانمەن بىردەي. مىسالى، مەنىڭ انام - وتباسىمىزدىڭ ءتۇتىنىن شىعارىپ وتىرعان ادام. وسىلاي ءبىر وتباسىنىڭ اسىراۋشىسىن، شامشىراعىن امان الىپ قالىپ، تيتتەي دە ءبىر كومەگىم تيسە، مەن ءۇشىن ودان اسقان باقىت جوق. ءوزىڭنىڭ حالقىنا كومەكتەسىپ، مەيىرىمدىلىك كورسەتۋ يگى ىستەرمەن ولشەنەدى ەمەس پە؟ جاي عانا 600 ميلليونعا روليك ءتۇسىرىپ، تەلەديدار ارقىلى ء"بىز بەرگەمىز" دەپ ۇرانداتقان پايدا جوق. سوزبەن ەمەس، ىسپەن دالەلدەيتىن ۋاقىت كەلدى. مەن بيلىكتەن حالقىمىزدىڭ جاعدايىن جاساپ بەرۋىن عانا سۇرايمىن. اتا زاڭىمىزدا "ادام ءومىرى - ءبىرىنشى قازىنامىز" دەپ كورسەتىلگەن. وكىنىشكە وراي، ءبىز سول قازىنامىزدى ساقتاي الماي جاتىرمىز.
دارىحانالارداعى ءدارى تاپشىلىعىن ەسكەرە وتىرا، ارمان دجۋماگەلديەۆ شىمكەنت قالاسىنىڭ تۇرعىندارىنا 2000 دانا كەرەكتى ءدارى-دەرمەكتى تەگىن تاراتتى. ول ءوزىنىڭ Instagram پاراقشاسىندا جاقىن كۇندەرى قازاقستاننىڭ باسقا قالالارىنا دا تەگىن ءدارى جەتكىزەتىنىن حابارلادى.
ال تانىمال بلوگەرلەر ارمان يۋسۋپوۆ پەن كارينا وكسۋكپاەۆا كومانداسىمەن بىرگە ادامدارعا ءدارى تابۋعا كومەكتەسەتىن komek2020.kz سايتىن اشتى. قازىر بۇل سايت بەلسەندى تۇردە جۇمىس ىستەپ تۇر.
قازاق «جۇمىلا كوتەرگەن جۇك جەڭىل» دەپ تەككە ايتپاسا كەرەك.
بۇل توتەنشە جاعداي كەزىندە اتقارىلعان يگى ىستەردىڭ ءبىر بولىگى عانا.
ەلىمىزدىڭ اۋىزبىرشىلىگى مەن تاتۋلىعىنىڭ ارقاسىندا ىندەتتى جەڭەتىن كۇننىڭ الىس ەمەس ەكەنىنە سەنىمىمىز مول.
ديانا اسانوۆا، «ادىرنا» ۇلتتىق پورتالى
