قازاقستان مۇسىلماندارى ءدىني باسقارماسىنىڭ COVID-19 ىندەتى كەزىندە جانازا جانە قۇدايى اس وتكىزۋگە قاتىستى مالىمدەمەسى.
اسا راقىمدى ەرەكشە مەيىرىمدى اللانىڭ اتىمەن باستايمىز!
قۇرمەتتى وتانداستار، قادىرلى باۋىرلار!
ەلىمىزدى دۇرلىكتىرگەن ىندەتتىڭ قاۋپى كۇننەن-كۇنگە ءورشىپ بارا جاتقانى وزدەرىڭىزگە ءمالىم. اۋرۋ ايتىپ كەلمەيدى.
«ساقتانساڭ – ساقتايمىن» دەمەكشى، تورتكۇل الەمگە قاۋىپ توندىرگەن دەرتكە نەمقۇرايلىق تانىتۋ – ءوزىمىز ءۇشىن عانا ەمەس، جانىمىزداعى جانداردىڭ ومىرىنە دە اسەرىن تيگىزەرى حاق.
وسى ورايدا، قازاقستان مۇسىلماندارى ءدىني باسقارماسى ەلىمىزدىڭ مۇسىلمان قاۋىمىن جانازا نامازى مەن قۇدايى استارعا قاتىسۋدىڭ كەلەسىدەي ەرەجەسىن ساقتاۋعا ۇندەيدى:
- جانازا نامازىنا قاتىستى تالاپتاردى ورىنداۋعا:
– جانازا نامازىنا ءبىر عانا ءدىني قىزمەتكەردىڭ قاتىسۋىنا;
– جانازا نامازىنا تەك وتباسى جانە جاقىن تۋمالارىنىڭ قاتىسۋىنا;
– جانازاعا جالپى سانى 30 كىسىدەن ارتىق جينالماۋعا;
– بويىندا دەنە قىزۋى نەمەسە جوتەلى بار كىسىنىڭ جانازا نامازىنا مۇلدە قاتىسپاۋىنا;
– جانازا نامازىنا كەلۋشى كىسى مىندەتتى تۇردە سانيتارلىق نورمالاردى (بەتپەردە تاعۋ، مەديتسينالىق قولعاپ كيۋ جانە ەكى مەتردەن كەم ەمەس اراقاشىقتىق) ساقتاۋعا;
- ىندەتتەن قايتىس بولعان ءمايىتتى دارىگەردىڭ نۇسقاۋلىعىنا ساي جۋعا;
– جانازا نامازى مەن ۋاعىزدىڭ جالپى ۋاقىتىن 5 مينۋتتان اسىرماۋعا;
– جانازا نامازى بارىسىندا قول الىسىپ امانداسپاۋعا;
– جانازا نامازىنىڭ سابىن تۇزەگەندە كەمىندە ەكى مەتر قاشىقتىقتى ساقتاۋعا;
– قابىر باسىندا ءمايىت جەر قوينىنا تاپسىرىلعاننان كەيىن جاماعاتتى تەزدەتىپ قايتارۋعا;
– جاسى ۇلكەن كىسىلەر، دەنساۋلىعى ناشار ادامدار (ەر جانە ايەل) جانە جاس بالالار جانازا نامازدارىنا قاتىسپاۋعا;
– قوناق اسىن وتكىزبەۋگە;
– جانازادان كەيىنگى استى وتكىزبەۋگە نەمەسە وتباسى مۇشەلەرىمەن شەكتەلۋگە.
- قۇدايى استارعا (جەتىسى، قىرقى، ءجۇزى، جىلى جانە تاعى باسقا) قاتىستى تالاپتاردى ورىنداۋعا:
– استاردى وتكىزبەۋگە نەمەسە وتباسى مۇشەلەرى، جاقىن تۋمالارىمەن شەكتەلۋگە;
– ءبىر عانا ءدىني قىزمەتكەردىڭ قاتىسۋىنا;
– سانيتارلىق نورمالاردى (بەتپەردە تاعۋ، مەديتسينالىق قولعاپ كيۋ جانە اراقاشىقتىق) ساقتاۋعا.
قۇرمەتتى جاماعات!
اللا تاعالا قاسيەتتى قۇراندا: «ءوز-وزدەرىڭدى ءوز قولدارىڭمەن قاۋىپ-قاتەرگە سالماڭدار», – دەپ ەسكەرتەدى. ءوز ءومىرىمىز بەن دەنساۋلىعىمىز – اللا تاعالانىڭ بىزگە بەرگەن اماناتى.
اللا ەلشىسى (وعان اللانىڭ سالاۋاتى مەن سالەمى بولسىن) ءوزىنىڭ ءبىر وسيەتىندە ادام بالاسىنىڭ وزىنە دە، وزگەگە دە زيان كەلتىرۋىنە قاتاڭ تۇردە تىيىم سالعان.
شاريعاتتا قاندايدا جۇقپالى اۋرۋدىڭ بەلگىسى تاراعان كەزدە اۋرۋدىڭ ەتەك الۋىن توقتاتۋدا كارانتين قاجەت ەكەنى اتاپ ايتىلعان. سوندىقتان قازىرگىدەي كوزگە كورىنبەيتىن زياندى دەرت تاراعان كەزدە ونىڭ الدىن الۋ – ءاربىر مۇسىلمان بالاسى ءۇشىن مىندەت.
قۇرمەتتى، وتانداستار!
سىزدە جوتەل پايدا بولىپ، بويىڭىزدا دەنە قىزۋىنىڭ جوعارىلاۋى بايقالسا نەمەسە تىنىس الۋ قيىنعا سوققان جاعدايدا دەر كەزىندە دارىگەرگە جۇگىنۋگە، سونداي-اق، قوعامدىق ورىندارعا، ءتىپتى مەشىتكە كەلۋدى توقتاتىپ، قۇلشىلىقتارىڭىزدى ۇيلەرىڭىزدە ورىنداۋعا كەڭەس بەرەمىز!
اللا تاعالا ەلىمىزدى، حالقىمىزدى ءتۇرلى اۋرۋ-سىرقاۋدان ساقتاعاي! ءاۋمين!
"ادىرنا" ۇلتتىق پورتالى
