Qazaqstan musylmandary dinı basqarmasynyń COVID-19 indeti kezinde janaza jáne qudaıy as ótkizýge qatysty málimdemesi.
Asa raqymdy erekshe meıirimdi Allanyń atymen bastaımyz!
Qurmetti otandastar, qadirli baýyrlar!
Elimizdi dúrliktirgen indettiń qaýpi kúnnen-kúnge órship bara jatqany ózderińizge málim. Aýrý aıtyp kelmeıdi.
«Saqtansań – saqtaımyn» demekshi, tórtkúl álemge qaýip tóndirgen dertke nemquraılyq tanytý – ózimiz úshin ǵana emes, janymyzdaǵy jandardyń ómirine de áserin tıgizeri haq.
Osy oraıda, Qazaqstan musylmandary dinı basqarmasy elimizdiń musylman qaýymyn Janaza namazy men Qudaıy astarǵa qatysýdyń kelesideı erejesin saqtaýǵa úndeıdi:
- Janaza namazyna qatysty talaptardy oryndaýǵa:
– Janaza namazyna bir ǵana dinı qyzmetkerdiń qatysýyna;
– Janaza namazyna tek otbasy jáne jaqyn týmalarynyń qatysýyna;
– Janazaǵa jalpy sany 30 kisiden artyq jınalmaýǵa;
– Boıynda dene qyzýy nemese jóteli bar kisiniń janaza namazyna múlde qatyspaýyna;
– Janaza namazyna kelýshi kisi mindetti túrde sanıtarlyq normalardy (betperde taǵý, medıınalyq qolǵap kııý jáne eki metrden kem emes araqashyqtyq) saqtaýǵa;
- Indetten qaıtys bolǵan máıitti dárigerdiń nusqaýlyǵyna saı jýýǵa;
– Janaza namazy men ýaǵyzdyń jalpy ýaqytyn 5 mınýttan asyrmaýǵa;
– Janaza namazy barysynda qol alysyp amandaspaýǵa;
– Janaza namazynyń sabyn túzegende keminde eki metr qashyqtyqty saqtaýǵa;
– Qabir basynda máıit jer qoınyna tapsyrylǵannan keıin jamaǵatty tezdetip qaıtarýǵa;
– Jasy úlken kisiler, densaýlyǵy nashar adamdar (er jáne áıel) jáne jas balalar janaza namazdaryna qatyspaýǵa;
– Qonaq asyn ótkizbeýge;
– Janazadan keıingi asty ótkizbeýge nemese otbasy múshelerimen shektelýge.
- Qudaıy astarǵa (jetisi, qyrqy, júzi, jyly jáne taǵy basqa) qatysty talaptardy oryndaýǵa:
– Astardy ótkizbeýge nemese otbasy músheleri, jaqyn týmalarymen shektelýge;
– Bir ǵana dinı qyzmetkerdiń qatysýyna;
– Sanıtarlyq normalardy (betperde taǵý, medıınalyq qolǵap kııý jáne araqashyqtyq) saqtaýǵa.
Qurmetti jamaǵat!
Alla Taǵala qasıetti Quranda: «Óz-ózderińdi óz qoldaryńmen qaýip-qaterge salmańdar», – dep eskertedi. Óz ómirimiz ben densaýlyǵymyz – Alla Taǵalanyń bizge bergen amanaty.
Alla Elshisi (oǵan Allanyń salaýaty men sálemi bolsyn) óziniń bir ósıetinde adam balasynyń ózine de, ózgege de zııan keltirýine qatań túrde tyıym salǵan.
Sharıǵatta qandaıda juqpaly aýrýdyń belgisi taraǵan kezde aýrýdyń etek alýyn toqtatýda karantın qajet ekeni atap aıtylǵan. Sondyqtan qazirgideı kózge kórinbeıtin zııandy dert taraǵan kezde onyń aldyn alý – árbir musylman balasy úshin mindet.
Qurmetti, otandastar!
Sizde jótel paıda bolyp, boıyńyzda dene qyzýynyń joǵarylaýy baıqalsa nemese tynys alý qıynǵa soqqan jaǵdaıda der kezinde dárigerge júginýge, sondaı-aq, qoǵamdyq oryndarǵa, tipti meshitke kelýdi toqtatyp, qulshylyqtaryńyzdy úılerińizde oryndaýǵa keńes beremiz!
Alla Taǵala elimizdi, halqymyzdy túrli aýrý-syrqaýdan saqtaǵaı! Áýmın!
"Adyrna" ulttyq portaly
