دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا تاڭەرتەڭگى بريفينگتە نۇر-سۇلتان، الماتى قالاسى جانە قاراعاندى وبلىسىنداعى ءدارىحانالاردا بۇگىننەن باستاپ پاراتسەتامول بولاتىنىن ايتقان. Tengrinews.kz تىلشىلەرى ەكى قالانىڭ ءدارىحانالارىن ارالاپ، پاراتسەتامول ىزدەپ كوردى.
"بۇگىننەن باستاپ ىستىقتى تۇسىرەتىن پاراتسەتامول پرەپاراتىنىڭ تابلەتكا ءتۇرى نارىقتا بار. الماتى، ەلوردا جانە قاراعاندى وبلىسىنداعى ءدارىحانالاردا بار جانە قالعان ايماقتاردىڭ بارلىعىنا دەيى جىبەرىلدى، اپتا سوڭىنا دەيىن بولادى", - دەدى ۆيتسە-مينيستر ليۋبميلا بيۋرابەكوۆا.
الايدا ەكى قالانىڭ 6 ءدارىحاناسىنان بۇل پرەپارات تابىلمادى.
"پاراتسەتامول جوق. ءبىر اپتادان بەرى كەلگەن جوق. بازادا تاپسىرىس بەرىپ قويدىق. بىراق ءالى ساتىلىمعا دا شىقپادى. بىردەن كورەتىن ەدىك... ۆيرۋسقا قارسى پرەپاراتتار دا جوق", - دەدى ەلوردالىق فارماتسەۆت.
نۇر-سۇلتانداعى "لاندىش" ءدارىحاناسىنىڭ الدىندا 5-6 ادامنىڭ سوڭىنا كەزەككە تۇردىق.
"تەك پاراتسەتامول سۇرايمىن دا شىعامىن", - دەگەن جىگىتتى كەزەكتە تۇرعاندار شۋلاپ وتكىزبەدى. سەبەبى ءبارى وسى ءدارىنى الۋ ءۇشىن تۇرعانىن ايتتى.
بىراق جۇمىس ۋاقىتى اياقتالعان سوڭ با، بىلمەيمىز، 5 مينۋتتان كەيىن 10 شاقتى ادام جينالا قالدى. كەزەك الىپ، كولىكتە كۇتىپ وتىرعاندارى دا بار.
كەزەگىمىز كەلىپ، ءبىز پاراتسەتامولدى سۇرادىق. جاۋاپ سول: ء"بىر اپتادان بەرى جوق، قاشان بولاتىنىن بىلمەيمىز".
الماتىداعى ءدارىحانالاردا "يبۋفەن" بار. "بيوسفەرا" ءدارىحانا سۋپەرماركەتىنىڭ الدىندا ادام جوق. پاراتسەتامول سۇرادىق.
"قالا بويىنشا جوق", - دەدى العاشقى كىرگەن دارىحاناداعى فارماتسەۆت.
ال "اپتەكا پليۋس" ءدارىحاناسىنىڭ الدىندا ادام قاراسى كوپ. كەزەككە تۇردىق.
ايتا كەتۋ كەرەك، كەزەكتە تۇرعاندار 2 مەتر قاشىقتىق ساقتاۋ كەرەگىن ەسكەرمەگەن.
كەزەكتىڭ سوڭى ۇزارىپ جاتقان سوڭ، شىققانداردان سۇرادىق. پاراتسەتامول جوق ەكەن.
ءبىز قالاداعى بارلىق ءدارىحانانى ارالاي الماعانىمىزدى ايتىپ ءوتۋ كەرەك. ءدارىحانادا قاجەت ءدارى بولماسا ماماندار ونى الماستىراتىن ءدارى-دارمەك الۋعا كەڭەس بەرىپ وتىر.
ەسكە سالايىق، بىرقاتار وڭىردەگى ءدارىحانالاردا ۆيرۋسقا قارسى دارىلەر، ونىڭ ىشىندە پاراتسەتامول جوق بولىپ، شۋ شىققان بولاتىن.
سوڭعى مالىمەتتەر بويىنشا ەلىمىزدە كوروناۆيرۋس جۇقتىرعاندار سانى 42 574-كە جەتتى 13845 ادام اۋرۋدان ايىقتى. 188 ناۋقاس قايتىس بولدى.
مەملەكەت باسشىسى قاسىم-جومارت توقاەۆ قازاقستاندا 5 شىلدەدەن باستاپ 14 كۇنگە كارانتين جاريالاۋ ۇسىنىلعانىن مالىمدەدى.
